İran, Tehran, 13 avqust / Trend /müxbir R.Azadbəxş , T. Cəfərov, R.Abdullayev / İran prezidentinin dəfələrlə İsrailin məhv olunacağı və Xolokost faciəsinin əfsanə olması haqda fikir bildirməsi ilə, onun müşaviri İsfəndiyar Rəhim Məşainin İsrail xalqını "dost" adlandırması tamamilə ziddiyət təşkil edir. Bu, İran hakimiyyətinin bir nömrəli düşməni olan İsrailə qarşı ikibaşlı siyasi oyun ola bilər. "İran rəsmilərinin İsrailə ziddiyətli münasibətləri diplomatik oyundur. Bu ziddiyyətlər dünya diplomatiyasında tanış jestdir "-deyə, İranın Daxili İşlər Nazirliyiynin sabiq rəsmilərindən olan Murtaza Allahverdi Trend -un Tehrandakı müxbirinə bidlirib.
Iranın Fars Agentliyinin avqustun 12-də yaydığı məlumata əsasən, İran Prezidentinin müşaviri İsfəndiyar Rəhim Məşainin son açıqlamasında İsrail vətəndaşlarını İranın mədəni və tarixi abidələrilə tanışlıq üçün İrana səfərə dəvət edib. Məşai bildirib ki, İran və İsrail xalqı dost xalqdır.
Allahverdi hesab edir ki, İran İslam Respublikasının diplomatları bir- birinə zidd fikirlər söyləyir. "İran prezidentinin müşaviri Məşainin son sözlərinə və İranın prezidenti Əhmədinejadın Xolokostun əfsanə olduğu haqda söylədiklərinə diqqət etsək,ziddiyyəti daha aydın görmək olar" - deyə İranın siyasi eksperti və sabiq dövlət rəsmisi Allahverdi bildirib.
Prezidentin müşaviri Fələstinin 60 illik böhranını həll etməyin ən yaxşı yolunu Fələstində yaşayan yerli sakinlər arasında referendum keçirməkdəgörür. Allahverdi əlavə edib ki, İranın bəzi rəsmilərinin Xolokost məsələsini əfsanə adlandırandan sonra, bu məsələ İsrail siyasətçiləri və mətbuatı dünya ictimaiyyətində belə bir fikir formalaşdırdılar ki, İran Yəhud xalqını məhv etmək istəyir. "Amma həqiqət budur ki, İranın belə bir fikri yoxdur və İran xalqı heç bunu xəyalına da gətirmirlər. Bundan başqa, İran rəsmilərinin İslam qaydalarına zidd hər hansı bir addım atacağı ağlasığmazdır" - Allahverdi çərşənbə günü bildirib.
Bu barədə Trend -a Israildən Begin-Sadat Bar-İlan Universitetinin Strateji Araşdırmalar Mərkəzinin eksperti Mordexay Kedar bildirib ki, İran Yaxın Şərqin əsl reallığı olan İsraili inkar siyasəti yürüdür.
İsrailli ekspertin sözlərinə görə, iranlıların radikal islam ideologiyasına bağlılığını nəzərə alsaq, İsraildə yaxşı anlayırlar ki, bütün İran rəsmiləri İsrail dövlətini tanımamaqda yekdildirlər.
Kedarın sözlərinə görə, ərazisi kiçik olsa da, hazırda İsrail müasir texnologiylarla təhciz edilmiş güclü silahlı qüvvələrə malikdir. Bu qüvvələr İranın nüvə təhlükəsinə müqavimət göstərə bilər.
"Bu gün İsrail - reallıqdır və gücün qeo siyasi mərkəzidir. Bunu İran hökuməti tanımaya bilməz" - deyə, Kedar bildirib.
Berlin Tədqiqat Mərkəzinin iranlı üzvü Mehran Bərati Trend -a açıqlamasında bildirib ki, İranın Ali dini lideri Əli Xamenei 1969-cu ildə İraqın Nəcəf şəhərində "İslami hökümət" haqda yazdığı bir materialda bildirib ki, müsəlmanların başına gələn bütün çətinliklər yəhudilər tərəfindəndir. Bundan başqa, Xamenei bir milyon yarımlıq İsrailin Ərəblərə necə qalib gəlməsindən yazmışdı və 150 milyonluq Misir və Suriya əhalisinin yəhudiləri məhv edə bilməməsi ilə bağlı fikirlərini bildirmişdi. "O vaxt Xamenei İsrail hökümətindən deyil, ümumiyyətlə ,yəhudi xalqına mənfi münasibət bildirmişdi"- deyə, Bərati bu gün telefonla Berlindən bildirib.
Bərati əlavə edib ki, İran hazırda İsrailin ölkəyə hücumunu ehtimal etdiyindən yəhudilərə qarşı olan İslam Respublikasının fikirləri söyləyirlər. Onun fikrincə, ola bilsin, İran prezidenti Əhmədinejadın dövlət strukturlarında hələ də elə şəxslər var ki, İsrail -İran müharibəsindən qorxurlar və İranın "yəhudilərin düşməni" imicini öz üzərlərindən götürmək istəyirlər. Ona görə indi bəzi İran rəsmiləri bildirir ki, biz İsrail xalqı ilə deyil, İsrail və sionist dövləti ilə müxalifik. " İsrailin özündə də bəzi sionistlər dini səbəblərdən dövlət qurmağın əleyhinədirlər" - deyə, Bərati hesab edir.
Berlin Tədiqat Mərkəzinin üzvünün fikrincə, Məşainin bu fikirləri Əhmədinejad və onun müşaviri arasında planlaşdırılmış bir oyun ola bilər. İran hökümətində bəzilərinin İsrail xalqı ilə dost olmaq istəyinə o qədər də inanmaq olmaz. "İran xalqı ilə İranın radikal rəsmiləri arasında bu məsələdə fikir ayrılığı var" - Bərati bildirib .
İRNA Agentliyinin avqusttun 13-də yaydığı məlumata əsasən, İran parlamentinin nümayəndələri Məşaini, İsrail xalqı ilə bağlı bəyanatına görə, istizah üçün parlamentə çağırıblar.
Müəlliflə əlaqə saxlamaq üçün elektron ünvan [email protected]
