Azərbaycan, Bakı, 10 noyabr / Trend , müxbir A.Hüseynbala/ Azərbaycanın müxalif partiyalarının təmsil olunduğu Demokratiya Uğrunda İttifaq (DUİ) İranın Azərbaycandakı səfirliyi qarşısında piket keçirməyə hazırlaşır.
"Güney Azərbaycanda soydaşlarımıza qarşı aparılan repressiyalarla bağlı, İranın Azərbaycandakı səfirliyinə bir müddət əvvəl göndərdiyimiz müraciətə cavab verilmir. Səfirliyə izahat üçün bir həftə vaxt verilib",- bazar ertəsi Trend - a DUİ-yə üzv olan Azadlıq Partiysının sədri Əhməd Oruc bildirib.
Trend - un arayışı: Demokratiya Uğrunda İttifaqda müxalifətçi Klassik Xalq Cəbhəsi, Azadlıq, Milli Demokratiya və Böyük Azərbaycan partiyaları təmsil olunur. İttifaq bu partiyaların məşvərət və əməkdaşlıq qurumudur.
Güney Azərbaycanda 35 milyona yaxın azərbaycanlı yaşayır. Milli - azadlıq uğrunda mübarizə aparan soydaşlarmız həbs olunur, müxtəlif repressiyalarla üzləşirlər.
Orucun sözlərinə görə, DUİ Sədrlər Şurasının iclasında Güney Azərbaycandakı soydaşlarımızla bağlı məsələ yenidən müzakirə olunub.
"Müzakirələrin nəticəsində İranın ölkəmizdəki səfirliyinə daha bir həftə vaxt verildi. Noyabrın 17-dək gözləyəcəyik, müraciətimizə cavab verilməsə, İranın Bakıdakı səfirliyi qarşısında etiraz aksiyası keçirilməsi haqda qərar qəbul edəcəyik", - Azadlıq Partiyasının sədri deyib.
Məqalə müəllifi ilə əlaqə ünvanı: [email protected]
