Azərbaycan, Bakı, 06 yanvar/ Trend , müxbir D.Xatınoğlu/ Əfqanıstanın xarici işlər nazirliyinin sözçüsü bildirib ki, Paksitanın hazırkı mülki hakimiyyəti, Əfqanıstanda sabitliyin qorunması ilə bağlı fərqli siyasət yürütməlidir.
Pakistan prezidenti Asif Əli Zərdari yanvarın 6-da Əfqanıstana səfər edib. Əfqanıstan XİN sözşüsü Sultan Əhməd Behin Trend -a açıqlamasında bildirib ki, Zərdarinin səfərinin əsas məqsədi iki ölkə arasında təhlükəsizlik məsələlərinin müzakirə olunmasıdır.
Behinin sözlərinə görə, səfəri zamanıiki ölkənin xarici işlər narizləri arasında müştərək bəyannamə də imzalancaq.
Behin çərşənbə axşamı telefonla bildirib ki, səfərdə iki ölkənin terrorzim və narkotiklərlə mübarizədə müştərək strateji əməkdaşlığı müzakirə olunacaq. Onun sözlərinə görə, iki ölkə əvvəllər də bu sahələr üzrə əməkdaşlığa hazır olduqlarını bildiriblər, lakin bu əməkdaşlıq sabiq prezident Pərviz Müşərrəfin hakimiyyəti dövründə həyata keçirilməyib.
Behin Pakistanın daxili təhlükəsizlik kəşfiyyat orqanı (İSİ) və Pakistan ordusunun hakimiyyətin nəzarətində olmamasını tənqid edərək, bildirib ki, İSİ və Milli Ordu mütləq Pakistanın hazırkı mülki hakimiyyətinə tabe olmalıdır və Əfqanıstana qarşı hər hansı addım atmamalıdır.
Əfqanıstan rəsmiləri dəfələrlə İSİ-ni Talibana yardım göstərməkdə ittiham ediblər.
Behinin sözlərinə görə, iki ölkənin kəşfiyyat orqanları informasiya mübadiləsinə hazırlaşırlar. O, Pakistan kəşfiyyatının bu məsələdə etibarlı tərəfdaş olacağına ümid etdiyini bildirib.
Əaqanıstan XİN sözçüsü əlavə edib ki, Zərdarinin Əfqanıstana səfərində iqtisadi sahədə, xüsusilə nəqliyyat sahəsində ikitərəfli müqavilələr də imzalanacaq. Behin iki ölkə arasında dəmir yolu xəttinin çəkilməsi üzrə saziş bağlanacağını da qeyd edib.