Azərbaycan, Bakı, 26 aprel /Trend, müxbir A.Hüseynbala/
Azərbaycanın müxalifət partiyası rəsmi şəkildə parlament seçkilərinə hazırlığa start verib.
"Partiyanın idarə heyətinin iclasında parlament seçkilərində 11 seçki dairəsi üzrə namizədlərin adları müəyyən olunub", - bazar ertəsi Trend-ə Azərbaycan Demokrat Partiyasının (ADP) mətbuat xidmətindən bildirilib.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Partiyanın sədri Sərdar Cəlaloğlu namizədliyini 21 saylı Nəsimi birinci seçki dairəsindən irəli sürəcək. "ADP sədrinin müavini Həsrət Rüstəmov 17 saylı Yasamal üçüncü, digər müavinlər Taliyət Əliyev 9 saylı Binəqədi ikinci, Rəşid Mansurov 22 saylı Nəsimi ikinci, Nurəddin İsmayılov 25 saylı Nizami ikinci, Zakir Hüseynov 34 saylı Xətai ikinci, Ali Məclisin sədri Vaqif Şirinov 125 saylı Zəngilan-Qubadlı seçki dairələrindən namizəd olacaqlar", - məlumatda vurğulanır.
ADP Ali Məclisinin sədr müavini İsa Nəcəfovun 45 saylı Abşeron, Sabunçu rayon təşkilatının sədri Eldəniz Xudiyevin 26 saylı Sabunçu birinci, Ali Məclisin üzvü Babək Sadıqovun 16 saylı Yasamal ikinci və Salyan rayon təşkilatının sədri Emil Məmmədovun 59 saylı Salyan seçki dairələrindən namizədliklərinin irəli sürülməsi müəyyənləşdirilib.
Sаğ təmаyüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2008-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Partiyasını yaradıblar.
