Azərbaycan, Bakı, 23 noyabr /Trend, müxbir T.Hacıyev/
Azərbaycanda keçirilən parlament seçkilərində iştirak edən müxalif və bitərəf namizədlərin forumu keçirilib.
Tədbirdə müxalif Xalq Cəbhəsi (AXCP) - Müsavat partiyalar blokunun, Klassik Xalq Cəbhəsi Partiyasının (KXCP) namizədləri və müstəqil namizədlər iştirak ediblər. Forum qərara alıb ki, parlament seçkilərinin nəticələri ləğv olunana və yeni demokratik parlament seçkiləri keçirilənə qədər siyasi fəaliyyətini davam etdirəcək.
AXCP, Müsavat, KXCP-nin heç bir namizədi parlament seçkilərində uğur qazanmayıb.
Noyabrın 7-də Azərbaycanda ölkə parlamentinə seçkilər keçirilib.
Mərkəzi Seçki Komissiyası ümumilikdə 20 seçki dairəsi üzrə 46 seçki məntəqəsində seçkilərin nəticələrini etibarsız sayıb. MSK yekun protokolu imzalayaraq bazar ertəsi Konstitusiya Məhkəməsinə təqdim edib. KM məsələyə noyabrın 26-da keçiriləcək iclasında baxacaq.
Forumda namizədlər Konstitusiya Məhkəməsinə müraciət imzalayıblar və siyasi mübarizənin tələblərini özündə ehtiva edən bəyanat qəbul ediblər. Bəyanatı 100 nəfərə yaxın deputatlığa namizəd imzalayıb. Bəyanatın açıq olduğu və bundan sonra da istəyən şəxslərin bəyanata qoşula biləcəyi elan olunub.