Azərbaycan, Bakı, 9 fevral /Trend/
Trend Kəpəz TV-yə istinadən xəbər verir ki, Gəncədə yüksək bal toplayaraq ali məktəblərə daxil olan tələbələrlə görüş keçirilib. Yeni Azərbaycan Partiyasının şəhər təşkilatında baş tutan tədbirdə müvəffəqiyyət qazanan tələbələr mükafatlandırılıb.
Tədbirə 600-dən yuxarı bal yığan tələbələr qatılıb. Azərbaycanın təhsil sistemi, savadlı gəncliyin gələcək prioritetləri, xaricdə təhsil kimi mövzular ətrafında geniş müzakirələr aparılıb. Tələbələr təhsilə, elmə verilən qiymətlə bağlı fikirlərini bölüşüblər.
YAP Gəncə şəhər təşkilatının sədri İsrafil İsmayılov: "Bu tədbirin keçirilməsində məqsədimiz ondan ibarətdir ki, yüksək bal yığaraq ali məktəblərə qəbul olan tələbələri bir daha bu uğurları ilə təbrik edək. Onlara həyatda bir vətəndaş kimi inkişaf etməkdə, eyni zamanda bir mütəxəssis kimi çalışmaqda kömək edək, müəyyən həyat təcrübəsi olan insanların tövsiyələrini dinləyərək daha da yaxşı nəticələr əldə ediləcəyini bildirək".
Həmçinin tədbirə qatılan şəhər ziyalıları və professorlar tələbələrə təhsillə bağlı öz tövsiyələrini veriblər.
Ali məktəblərdə Bolonya sisteminin üstünlükləri, orta məktəblərdə tətbiq olunan kurikulumun nəticələri tələbələrin diqqətinə çatdırılıb. Müasir Azərbaycanın tədris müəssisələrinin maddi-texniki bazasının sürətlə inkişafından söz açılıb.
"Bu gün Azərbaycan Dövlətində ulu öndər Heydər Əliyevin başladığı, müstəqil Azərbaycan dövlətçiliyinin siyasəti, gənclərimizə dövlət səviyyəsində göstərilən qayğılar, onların xaricdə təhsil alması üçün yaradılan şərait və eyni zamanda ümumiyyətlə gənclərə göstərilən bütün bu qayğıların fonunda gənclərimizin çalışması, fəaliyyət göstərməsinə zəmin yaradaq", İsmayılov bildirib.
Tədbir çərçivəsində Yeni Azərbaycan Partiyasına daxil olmaq üçün müraciət edənlərə partiya biletləri təqdim olunub. Eləcə də yüksək bal yığan tələbələrə xatirə hədiyyələri verilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
