Azərbaycanda suriyalı qaçqınlara yardım kampaniyasına start verildi

Azərbaycan, Bakı, 3 aprel /Trend/

Azərbaycan Qızıl Aypara Cəmiyyəti öz missiyasına uyğun olaraq "Suriya qaçqınlarına yardımınızı əsirgəməyin" şüarı ilə məlum münaqişədən zərərçəkmiş insanlara yardım kampaniyasına start verib.

Cəmiyyətdən Trend-ə verilən məlumata görə, yardım Türkiyə sərhədində çadır şəhərciklərində məskunlaşmış qaçqın və məcburi köçkünlər üçün nəzərdə tutulub. Maddi yardımlar köçürmə yolu ilə Azərbaycan Qızıl Aypara Cəmiyyətinin bank hesablarına və Cəmiyyətin rəsmi internet səhifəsindəki "Onlayn ianə" linkinə daxil olaraq birbaşa bank kartlarından köçürülə bilər. Kampaniya barədə Cəmiyyətin rəsmi saytında xüsusi yer ayrılıb və ianə etmiş hər bir təşkilat və vətəndaşın adı və məbləğ xüsusi hazırlanmış cədvəldə qeyd olunur (www.redcrescent.az).

Qeyd edək ki, dünya təcrübəsinə əsaslanaraq, xüsusilə, beynəlxalq hərəkatın missiyasına uyğun olaraq, Azərbaycan Qızıl Aypara Cəmiyyəti belə kampaniyalar keçirib. Misal üçün, Türkiyənin Van vilayətində və İranın Şərqi Azərbaycan əyalətində baş vermiş zəlzələdən, Somalidəki səfalətdən əziyyət çəkənlərə maddi yardım məqsədilə belə uğurlu kampaniyalar keçirilib. Yerli hökumət və qeyri-hökumət strukturları, ayrı-ayrı şəxslər, iş adamları, müxtəlif şirkətlər və millət vəkilləri bu kampaniyalarda fəal iştirak ediblər.

Əvvəlcə bu kampaniyaya ənənəvi olaraq Azərbaycan Qızıl Aypara Cəmiyyətinin prezidenti, millət vəkili Novruz Aslanov qoşulub.

Ödəniş üçün bank rekvizitləri:

Onlayn ianə - http://www.redcrescent.az/donation/indexaz.php