Bakı. Elçin Mehdiyev – Trend:
Bu gün 90 saylı Ağdaş seçki dairəsi üzrə Milli Məclisə keçirilən təkrar seçkilərlə əlaqədar seçici fəallığı açıqlanıb.
Trend-in məlumatına görə, saat 10:00-a 90 saylı Ağdaş seçki dairəsi üzrə Milli Məclisə keçirilən təkrar seçkilərdə seçici fəallığı 11,2 faiz təşkil edib. Bu barədə Mərkəzi Seçki Komissiyası Katibliyinin İnformasiya Mərkəzinin müdiri Fərid Orucov məlumat verib.
Bu müddət ərzində 40203 seçicidən 4517 seçici səs verib.
Qeyd edək ki, bu gün 90 saylı Ağdaş seçki dairəsi üzrə Milli Məclisə təkrar seçkilər keçirilir.
Səsvermə saat 08:00-da başlayıb və 19:00-da başa çatacaq. Seçkiləri 500-dən artıq yerli və xarici müşahidəçi izləyəcək.
Seçkilərdə 7 namizəd iştirak edir. Bunlar Yeni Azərbaycan Partiyasından namizəd Cavid Osmanov, Ümid Partiyasından namizəd İqbal Ağazadə və bitərəf namizədlər Əli Haqverdiyev, Anar İbrahimli, Rəşid Gözəlov, Rəşad Abdullayev və Elmir Gözəlovdur.
Mərkəzi Seçki Komissiyasının 17 noyabr 2015-ci il tarixli iclasında 90 saylı Ağdaş seçki dairəsi üzrə beşinci çağırış Milli Məclisə seçkilərin nəticələri etibarsız hesab edilmişdi.