"Azərbaycan Milli Demokrat Partiyası (AMDP) ilə heç bir hüquqi və fiziki şəxs müqavilə bağlamaq istəmir". Bu barədə Trend agentliyinə AMDP sədrinin birinci müavini Oqtay Xəlilli bildirib.
Qeyd edək ki, AMDP oktyabrın 4-də Rəsul Rza 96 ünvanda yerləşən qərargahdan çıxarılıb. Bu günədək özünə yeni qərargah icarəyə götürmək məqsədilə müxtəlif ünvanlara müraciət etsə də, partiya ilə müqavilə bağlayan yoxdur. Səbəbini isə O.Xəlilli belə izah edib: "Siyasətlə məşğul olduğumuza və müxalifət mövqeyindən çıxış etdiyimizə görə bütün qapılar üzümüzə bağlanıb".
Hazırda müxtəlif iaşə obyektlərində toplandıqlarını bildirən AMDP funksioneri seçkiöncəsi belə bir vəziyyətlə üzləşdiklərindən təəssüfləndiklərini və bunun uzun sürməyəcəyini bildirib: "Qərargahla təmin olunmaqdan ötrü lazımi dövlət orqanlarına da müraciətlər etmişik. Hələ cavab gözləyirik. Qanun çərçivəsində istədiyimizə nail olmasaq, aksiyalar keçirməyi planlaşdıracağıq".
