Almaniya Xalq Universitetləri Birliyinin Beynəlxalq Əməkdaşlıq İnstitutunun Cənubi Qafqazda sabit və demokratik cəmiyyətin inkişafına dəstək məqsədilə yaşlıların təhsili üzrə layihəsi çərçivəsində Zaqatala rayonunda "Azərbaycan davamlı inkişaf yolunda" mövzusunda seminar keçirilib. Bu barədə Trend ə Ombudsman Aparatından məlumat verilib.
Seminarda rayon icra hakimiyyətinin, bələdiyyələrin, qeyri-hökumət təşkilatlarının nümayəndələri, yerli sahibkarlar iştirak ediblər. Tədbirdə Ombudsman Aparatının sektor müdiri, Ombudsman yanında ahıllar üzrə xüsusi müşavir, Yaşlıların Təhsili üzrə Koordinasiya Şurasının üzvü Yeganə Cəfərova "Təhsil hüququ yaşlıların da inkaredilməz hüququdur" mövzusunda məruzə edib. O, yaşlıların təhsil, sağlamlıq, sosial müdafiə hüquqlarından danışıb, onlara təmənnasız hüquqi, psixoloji, tibbi təhsilin verilməsi təcrübsindən söz açıb.
Müzakirələr zamanı bələdiyyə nümayəndələri və sahibkarlar tərəfindən bəzi problemlər diqqətə çatdırılıb, onların həlli istiqamətində bir sıra təkliflər irəli sürülüb.
