2 fevral - Azərbaycan Gəncləri günü ilə əlaqədar Naxçıvanda silsilə tədbirlər keçiriləcək. Trend in Naxçıvan Bürosu Naxçıvan MR Gənclər və İdman Nazirliyinin məlumatına istinadən xəbər verir ki, artıq bununla bağlı tədbirlər planı hazırlanaraq müvafiq təşkilatlara təqdim edilib.
Adıçəkilən təşkilatdan Trend ə bildiriblər ki, tədbirlər planına əsasən ilk növbədə Naxçıvan MR Gənclər və İdman, Naxçıvan MR Təhsil Nazirlikləri ilə birgə şer və rəsm müsabiqələrinin keçirilməsinə yanvarın 25-dən başlanılıb. Bundan əlavə Naxçıvan MR Gənclər və İdman nazirliyinin Naxçıvan Qarnizonu ilə birgə müxtəlif hərbi hissələrdə tədbirlərin keçiriləcəyi bildirilir.
Silsilə tədbirlərin tərkibində "Müstəqil Azərbaycanın gələcəyi gənclərindir" devizi altında KİV materialları əsasında Naxçıvan Televiziyası və "Şərq Qapısı" qəzetləri ilə birgə yaradıcılıq müsabiqəsinin keçirilməsi, növbəti günlərdə Naxçıvan Dövlət Universitetində "Dəyirmi Masa"nın təşkili, bir sıra təşkilatlarda disput və elmi-praktiki konfransların təşkili də nəzərdə tutulub.
