Azərbaycan, Bakı / Trend müxbir İ.Əlizadə/ Azərbaycan Demokrat Partiyasının (ADP) Müsavat Partiyası ilə müttəfiq olması mümkün deyil. ADP qurultaya hazırlıq üzrə Təşkilat Komitəsinin üzvü Taliyət Əliyev bildirib ki, hazırda iki partiya arasında heç bir müzakirə aparılmır.
"Mən ADP ilə Müsavatın müttəfiq olmasını istisna edirəm. Hazırda bu aktual deyil və heç bir siyasi əhəmiyyət daşımır. Eyni zamanda ADP Müsavatdan fərqli siyasət yürüdür", -deyə T.Əliyev qeyd edib.
O, iki partiyanın əməkdaşlığı məsələsinin gələcəkdə reallaşacağını istisna etməyib.
ADP "Azadlıq" blokundan xaric olunduqdaq sonra bu partiyanın Müsavatla yaxınlaşacağı gözlənilir.
Qeyd edək ki, müxalifəti təmsil edən ADP 1991-ci ildə yaradılıb. Partiya sədri, Azərbaycanın eks-spikeri Rəsul Quliyev 1996-cı ildən mühacirətdə yaşayır. Bir müddət əvvəl partiyada parçalanma baş verib və ADP sədr Rəsul Quliyev və onun keçmiş birinci müavini Sərdar Cəlaloğlunun tərəfdarlarından ibarət iki hissəyə parçalanıb. ADP üzv olduğu "Azadlıq" blokundan da xaric olunub.