Azərbaycan, Bakı / Trend müxbir S.İlhamqızı/ Azərbaycan Milli İstiqlal Partiyasının (AMİP) lideri Etibar Məmmədovun Beynəlxalq Demokrat İttifaqının Xorvatiyanın Dubrovnik şəhərində keçirilən iclasında Güney Azərbaycanla bağlı hazırladığı qərar layihəsi qəbul edilib. Bu barədə cümə günü AMİP-dən məlumat verilib.
Aprelin 25-dən başlanan BDİ-nin toplantısında cümə günü Güney Azərbaycandakı vəziyyətlə bağlı məsələ müzakirəyə çıxarılıb. AMİP liderinin hazırladığı sənəd beynəlxalq qurum tərəfindən qəbul edilib. Sənəddə Güney azəraycanlıların hüquqları və öz haqları uğrunda apardıqları müarizəyə dəstək verilib. Altı bənddən ibarət qərarda deyilir: "Azərbaycanılar tarixlərini öyrənmək və yazmaq hüququna malikdirlər. Azərbaycan dilinə İranda rəsmi "azlıq dili" statusu verilməlidir. İranda yaşayan azərbaycanlılar öz dillərini sərbəst şəkildə həm şifahi, həm də yazılı formada istifadə etmək, övladlarını ana dilində oxutmaq hüququna malikdir. İranda Azərbaycan xalqına öz siyasi və mədəni təşkilatlarını yaratmaq hüququ verilməlidir.
Azərbaycanlılara öz mədəniyyətlərini və irslərini qorumaq haqqı verilməlidir. Azərbaycanlıların demokratik, mədəni və insan haqları qorunmalı və bu dəyərlərin inkişafına dəstək verilməlidir"-deyə qərarda bildirilir.
BDİ-yə üzv ölkələrin nümayəndələri bu sənəddə göstərilən məsələləri öz dövlətlərinin parlamentləri və hökumətləri qarşısında qaldırmağa dair öhdəlik götürüblər.
Xatırladaq ki, dünyanın 70-dən çox ölkəsinin 86 sağ-mərkəzçi partiyasını özündə birləşdirən BDİ-nin toplantısı davam edir.
Azərbaycanın müxalifət partiyası olan AMİP 1997-ci ildən BDİ-nin üzvüdür. Partiyanın lideri Məmmədov isə 2003-cü ildən BDİ-nin sədr müavinidir.