Azərbaycan, Bakı, 30 yanvar / Trend , müxbir K. Zərbalıyeva/ Sabiq səhiyyə naziri saxlandığı 13 saylı cəzaçəkmə müəssisəsinə baxış keçirilməsi barədə Bakı Apellyasiya Məhkəməsinə vəsatət verib.
Bu barədə çərşənbə günü Trend ə Əli İnsanovun vəkili Toğrul Babayev məlumat verib.
Babayev bildirib ki, sabiq nazirin apellyasiya şikayəti üzrə keçirilən prosesdə 13 saylı cəzaçəkmə müəssisəsinin nümayəndəsi İnsanovun cəza çəkdiyi müəssisədə onun müalicəsi üçün lazımi şəraitin yaradılması barədə məlumat verib.
Bununla razılaşmayan sabiq nazir məhkəməyə vəsatətlə müraciət edərək, cəza çəkdiyi müəssisədə heç bir şəraitin olmadığını, müəssisədə işıq və su probleminin olduğunu qeyd edib və bunu özünə qarşı işgəncə kimi qiymətləndirib.
Sabiq nazir vəsatətində Apellyasiya Məhkəməsində keçirilən prosesdə iştirakının təmin olunması və cəza çəkdiyi müəssisəyə məhkəmənin baxış keçirməsini xahiş edib.
Vəsatət bu gün 13 saylı cəzaçəkmə müəssisəsinin rəhbərliyinə təqdim olunub.
Korrupsiya və vəzifə cinayətlərində ittiham olunan sabiq səhiyyə naziri İnsanov məhkəmənin hökmü ilə, əmlakı müsadirə olunmaqla, 11 il azadlıqdan məhrum edilib.
O, dövlət çevrilişinə cəhd, kütləvi iğtişaşlara hazırlığa görə 2005-ci ilin oktyabrında həbs olunub.
İnsanov müalicəsinə imkan verilməməsi, saxlanma şəraitinin ağır olmasına görə, ədliyyə naziri Fikrət Məmmədov və Penitensiar Xidmətin rəhbərliyindən Nəsimi rayon məhkəməsinə müraciət edib. Məhkəmə onun iddiasını təmin etməyib. Sabiq nazir məhkəmənin qərarından apellyasiya şikayəti verib.
Apellyasiya şikayəti üzrə məhkəmə baxışı fevralın 5-də davam etdiriləcək.
