Azərbaycan, Bakı,01 may / Trend , müxbir K. Zərbalıyeva/ Ali Məhkəmə sabiq səhiyyə nazirinin telekanallara qarşı iddiası üzrə məhkəmə qərarını qüvvədə saxlayıb. Ali Məhkəmədən bildirilib ki, cümə axşamı keçirilən prosesdə sabiq nazir Əli İnsanovun Apellyasiya Məhkəməsinin qərarından verdiyi şikayəti rədd edib və qərarı qüvvədə saxlayıb.
İnsanov 2006-cı ildə həbs olunarkən Az TV və "Lider" televiziyaları istintaq materialları əsasında onun barəsində veriliş hazırlayıb. Sabiq nazir həmin kanalları şərəf və ləyaqətinin müdafiəsi iddiası ilə Səbayel rayon məhkəməsinə verib.
Səbayel rayon məhkəməsi İnsanovun şikayətini təmin etməyib. Apellyasiya Məhkəməsi də qərarı qüvvədə saxlayıb.
Dövlət çevrilişinə cəhd, kütləvi iğtişaşlara hazırlığa görə 2005-ci ilin oktyabrında həbs olunmuş sabiq səhiyyə naziri bu il məhkəmənin hökmü ilə korrupsiya cinayətlərində təqsirli bilinərək, əmlakı müsadirə olunmaqla, 11 il azadlıqdan məhrum edilib.
Müəlliflə əlaqə saxlamaq üçün elektron ünvan - [email protected]