Azərbaycan, Bakı, 04 dekabr/ Trend , müxbir A.Hüseynbala/ Dünya Azərbaycanlıları Konqresi (DAK) Güney Azərbaycanda yaşayan soydaşlarımıza qarşı repressiyalarla bağlı xarici ölkə parlamentlərinə müraciət edəcək.
"Konqresin nümayəndələri yaxın zamanda Belçika Senatında və Avropa Parlamentində görüşlər keçirəcək. Mən də İsveç parlamentində çıxış edib İranda yaşayan soydaşlarımızın hüquqlarının pozulması haqda məlumat verəcəyəm", - cümə axşamı Trend -a Dünya Azərbaycanlıları Konqresinin həmsədri, Vətəndaş Həmrəyliyi Partiyasının sədri, millət vəkili Sabir Rüstəmxanlı bildirib.
Trend -un arayışı: DAK daxilində yaranmış narazılıqlar nəticəsində İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyirlər.
İyunun 6-8-də Almaniyanın Köln şəhərində keçirilmiş Rüstəmxanlının sədrlik etdiyi DAK-ın qurultayında 25 ölkədən 300-dək nümayəndə və qonaq iştirak edib. Qurultayda DAK-ın Nizamnaməsi və Məramnamsəinə dəyişikliklər qəbul olunub. DAK-da həmsədrlik institutu yaradılıb, Rüstəmxanlı və Firidin Pərvizniya DAK-ın həmsədrləri seçilib. Qulamrza Səbri Təbrizi Köln qurultayını qeyri-legitim hesab edib. İyunun 11- də Köln qurultayının yekunlarına həsr olunmuş mətbuat konfransında Rüstəmxanlı bəyan edib ki, bundan sonra Dünya Azərbaycanlıları Konqresi adına iddialılar məhkəmə qarşısında cavab verəcəklər.
Təbrizinin sədrlik etdiyi DAK-ın iyunun 21-23-də Brüsseldə Avropa Parlamentində keçirdiyi qurultayında təşkilatın Nizamnaməsinə dəyişklik edilib. Dəyişikliyə əsasən, Quzey Azərbaycandan Paşa Qəlbinur, Güney Azərbaycandan isə DDAK sədri Məmmədrza Xəşti DAK-ın həmsədri seçilib. Təbrizi DAK-ın fəxri sədri seçilib.
Onun sözlərinə görə, bir müddət əvvəl ABŞ-a səfəri zamanı Konqres üzvlərinə Güney Azərbaycandakı repressiyalar, insan haqlarının pozulması ilə bağlı konkret sənədlər təqdim edilib: "Bu sənədlərdə 35 milyonluq bir xalqın aşağılanması, İran hakimiyyətinin beynəlxalq təşkilatların iradlarını nəzərə almadan bir xalqı məhv etmək siyasəti ilə bağlı bütün faktlar öz əkisini tapıb", - Rüstəmxanlı vurğulayıb.
DAK sədri deyib ki, İranın Azərbaycandakı səfirliyinin soydaşlarımıza qarşı işgəncə və repressiyalara reaksiyası onu qane etmir: "Bir müddət əvvəl İran səfiri ilə dörd saata qədər görüşüm olub. Problemlərin hamısını onun nəzərinə çatdırdım. Amma təəssüf ki, mən İranda soydaşlarımızın haqlarının pozulmasından, o isə atom elektrik stansiyasının tikilməsindən, göyə raket buraxılmasından danışırdı. Səfir soydaşlarımızın vəziyyətindən, ümumiyyətlə danışmaq istəmir. Deyir ki, bunlar keçib gedəcək", - Rüstəmxanlı bildirib.
DAK 1997-ci ildə Los-Ancelesdə təsis olunub və qurumun təsisçiləri Brüsseldə keçirilən qurultayda İdarə Heyətinin üzvləri seçilib. Konqresin fəaliyyəti dünya azərbaycanlılarının hüquqlarının müdafiəsi və Cənubi Azərbaycanın müstəqilliyi uğrunda mübarizəyə yönəlib.
Məqalə müəllifi ilə əlaqə ünvanı: [email protected]
