Azərbaycan, Bakı, 22 noyabr /Trend/
Azərbaycanda bu ilin 10 ayı ərzində 623 bələdiyyə sədri barəsində inzibati xəta haqqında protokollar məhkəməyə təqdim edilib, habelə 25 bələdiyyənin fəaliyyətində aşkar edilmiş hüquq pozuntuları, o cümlədən maliyyə əyintiləri ilə əlaqədar materiallar prokurorluğa göndərilib. Trend-in məlumatına görə, bunu çərşənbə axşamı ölkənin rəsmi mətbuatı sayılan "Azərbaycan" qəzetində nəşr olunan yazısında ədliyyə naziri, Məhkəmə-Hüquq Şurasının sədri Fikrət Məmmədov deyib.
"Eyni zamanda, hesabat dövründə bələdiyyələr tərəfindən qanunsuz ayrılmış 3300 hektara yaxın torpaq sahəsinin geri qaytarılması təmin olunub", - Məmmədov bildirib.
Onun sözlərinə görə, nazirliyin Bələdiyyələrlə İş Mərkəzi tərəfindən yerli özünüidarə orqanlarına metodoloji yardımın göstərilməsi, habelə bələdiyyələrin fəaliyyətinə inzibati nəzarətin həyata keçirilməsi işinin təkmilləşdirilməsi məqsədilə bələdiyyə üzləri ilə 30-dan çox zona seminarı keçirilib. 3500-ə yaxın bələdiyyə üzvü və bələdiyyə quluqçusu ixtisasartırma kurslarına cəlb edilib. Həmçinin, bu il ərzində inzibati nəzarət qaydasında 30 mindən çox bələdiyyə aktı yoxlanılıb, onlardan 816-sı nazirliyin təklifləri əsasında dəyişdirilib və ya ləğv edilib.
Nazir, həmçinin qeyd edib ki, məhkəmə qərarlarının icrasının təmin edilməsində xüsusi rolu olan nazirliyin İstintaq idarəsində ədalət mühakiməsi əleyhinə, o cümlədən məhkəmə qərarlarının icra olunması ilə bağlı bu ilin 10 ayı ərzində 162 cinayət işinin istintaqı tamamlanıb.
"Nazirliyin Məhkəmə-Ekspertizası Mərkəzinə bu il 16 mindən çox iş daxil olub ki, onlardan da 92 faizi icra olunub, ekspertlər qarşısında qoyulmuş 210 mindən çox sual cavablandırılıb, məhkəmə-istintaq orqanlarına metodiki yardım məqsədilə 9 vəsait hazırlanıb, habelə 230 profilaktik sənəd göndərilib", - nazir deyib.
Bu gün Azərbaycanda ədliyyə işçilərinin peşə bayramı günüdür.