Azərbaycan, Bakı, 16 sentyabr /Trend, müxbir İlhamə İsabalayeva/
Azərbaycan Respublikasının Prezidenti yanında Elmin İnkişafı Fondunun xaricdə elmi tədbirlərdə və qısamüddətli təcrübəkeçmədə iştirakı əhatə edən və 2014-cü ildə keçirilmiş 5-ci "Mobillik qrantı" müsabiqəsinin nəticələri elan olunub.
Fonddan Trend-ə verilən məlumata görə, müsabiqəyə daxil olmuş 23 layihənin ekspertizası nəticəsində 2 layihə texniki ekspertiza mərhələsindən keçməyib, 21 layihə isə elmi ekspertiza mərhələsinə buraxılıb.
Nəticələr Fondun Himayədarlar Şurası tərəfindən təsdiq edildikdən sonra 5-ci "Mobillik qrantı" müsabiqəsi üzrə ümumi maliyyələşdirmə həcmi 61 500 manat olan 14 qalib layihə müəyyənləşdirilib.
5-ci "Mobillik qrantı" müsabiqəsində qalib olan layihələrdən 8-i qısamüddətli elmi təcrübəkeçmə ilə, 6-sı isə xaricdə elmi tədbirdə iştirakla bağlı layihələrdir. Qaliblərdən 7-si qadındır. Qaliblərin yaşı 24-59 arasında dəyişir. Qalib layihələrin 11-i AMEA institutlarını (İdarəetmə Sistemləri, Şamaxı Astrofizika Rəsədxanası, Fizika, Coğrafiya, Torpaqşünaslıq və Aqrokimya, Genetik Ehtiyatlar, Əlyazmalar, Fəlsəfə və Hüquq, Şərqşünaslıq, Ədəbiyyat, Memarlıq və İncəsənət) və təhsil qurumlarını (Bakı Dövlət Universiteti, Azərbaycan Dövlət Aqrar Universiteti, Azərbaycan Dövlət Pedaqoji Universiteti) əhatə edir.
Fizika-riyaziyyat və texnika elmləri üzrə 3, kimya elmləri üzrə 1, Yer haqqında elmlər üzrə 1, biologiya, tibb və aqrar elmləri üzrə 3, humanitar və ictimai elmlər üzrə isə 6 layihə qalib elan olunub.
Qeyd edək ki, yaxın günlərdə Elmin İnkişafı Fondu növbəti "Mobillik qrantı" müsabiqəsini elan edəcək.