Azərbaycan, Bakı, 10 aprel /Trend/
Bakı Dövlət Universitetində (BDU) SABAH qrupları üzrə "SABAH-ın könüllüsü" proqramının təqdimatı keçirilib.
Universitetin Mətbuat və informasiya şöbəsindən Trend-ə verilən məlumata görə, tədbiri BDU üzrə SABAH Mərkəzinin rəhbəri, dosent İradə Süleymanova açıb. O, tələbələrə "SABAH-ın könüllüsü" proqramı və onun yaradılması haqqında qısa məlumat verib.
Sonra "SABAH-ın könüllüsü" komandasının BDU üzrə supervayzerləri özlərini SABAH qrupları tələbələrinə təqdim edib və proqram çərçivəsində görüləcək işlər barədə məlumat veriblər.
Daha sonra əvvəlcədən elan olunmuş "SABAH-ın ideyası" müsabiqəsinin qalibi elan edilib. Qalib Kimya fakültəsinin II kurs tələbəsi Naibə Elestun qızı Cəbiyeva olub.
Tədbirin sonunda tələbələrin hazırladığı "SABAH-ın fəaliyyəti" videoçarxı nümayiş etdirilib.
