Bakı. Trend:
14 iyun tarixində PAŞA Həyat, İRS nəşriyyat evi və Azərbaycanın İtaliyadakı səfirliyinin birgə təşkilatçılığı ilə İtaliya Senatında “Azərbaycanda mina problemi: Beynəlxalq humanitar hüquq məsələsi” mövzusunda konfrans keçirilib.
Tədbirdə İtaliya İnsan Hüquqları Federasiyası-İtaliya Helsinki Komitəsinin sədri, professor Antonio Stanqo, İtaliya Senatının Avropa İttifaqı siyasəti komissiyasının sədri, senator Ciuliomaria Terzi Di Sant’Aqata, PAŞA Həyat İdarə Heyətinin sədri Niyaz İsmayılov, “İRS” nəşriyyat evinin baş redaktoru Musa Mərcanlı və digər çıxışçılar tərəfindən sözügüdən problemə toxunulub.
Konfrans çərçivəsində PAŞA Həyat şirkətinin dəstəyi ilə Azərbaycanın işğaldan azad olunmuş ərazilərində törədilən mina terrorunun, mina və partladıcı sursatların yaşatdığı dəhşətin dünya ictimaiyyətinə və beynəlxalq qurumlara çatdırmaq məqsədilə nəşr edilən “Gizli ölüm toxumları” kitabının təqdimatı baş tutub.
“PAŞA Həyat Sığorta” ASC-nin İdarə Heyətinin sədri Niyaz İsmayılov rəhbərlik etdiyi şirkətin bir sıra korporativ sosial layihələr reallaşdırdığını, “İRS” nəşriyyat evi ilə 10 ilə yaxındır davam edən əməkdaşlıq çərçivəsində Azərbaycanın mədəni irsinin, adət-ənənələrinin beynəlxalq miqyasda tanıdılması və təbliği məqsədilə kitabların nəşrlərinin həyata keçirildiyini bildirib. “Gizli ölüm toxumları” kitabının önəmindən bəhs edən N.İsmayılov Azərbaycan torpaqlarının işğal zamanı və münaqişədən sonra Ermənistan tərəfindən gizli ölüm toxumları olan minalar ilə zəhərləndiyini vurğulayıb. O, həmçinin Azərbaycanın beynəlxalq hüquq və ədalətə əsaslanan mübarizəsində göstərdiyi dəstəyə görə İtaliyaya təşəkkürünü bildirib, iki ölkə arasındakı dostluq, əməkdaşlıq və güclü iqtisadi əlaqələrin hər gün daha da inkişaf etdiyini diqqətə çatdırıb.
Bildirək ki, İRS silsiləsi çərçivəsində ərsəyə gələn kitablar cəmiyyətimizin və ölkəmizin mədəni sərvətlərini tanıtmaq üçün əhəmiyyətli rol oynayır. Azərbaycanın qədim tarixini, füsunkar təbiətini, çoxəsrlik mədəniyyətini özündə əks etdirən yüksək keyfiyyətli çap məhsullarının hazırlanmasına tarixçilər və xarici mütəxəssislər də cəlb olunur.
PAŞA Həyat və İRS Nəşriyyat Evinin birgə əməkdaşlığı çərçivəsində indiyədək çox sayda kitab işıq üzü görüb. Bunlar nəşr olunmuş “Qədim qalanın yuxuları”, “Qobustan – minilliklər kitabı”, “Təbrizin sehrli nağılları”, “Qədim və gözəl Qarabağ”, “Məftun edən şəhər”, “Bakı simfoniyası”, “Daş keşikçilər”, ”Zəfər Salnaməsi”, “Qarabağ – əsrlərin salnaməsi”, “Gəncə - Nizami yurdu”, “Şəki - Gözəlliyin Sehri”, “Salam, Azərbaycan!”, “Qarabağın Qara Kitabı” və “Qarabağ – Qələbə Yolları ilə”, "Şuşa. Zirvədən uca", "Şuşa. Qarabağın ulduzu" və "Gizli ölüm toxumları" kitablarıdır.
Qeyd edək ki, Lider sığorta şirkəti - “PAŞA Həyat Sığorta” ASC 2010-ci ilin noyabr ayından fəaliyyət göstərir. 31 dekabr 2022-ci il tarixinə şirkətin audit olunmuş məcmu aktivləri 562 mln. AZN təşkil etmişdir. Şirkət müştərilərə müxtəlif həyat sığortası məhsulları, o cümlədən “İstehsalatda bədbəxt hadisələrin icbari sığortası”, yığım tərkibli “Həyatın yaşam sığortası” məhsullarını təklif edir.
