Bakı. Trend:
İşdə xəsarət alan işçi ilə işəgötürən arasında bəzi hallarda qarşılıqlı razılıq əldə olunur, lakin sonradan hüquqi problemlər yaranır.
Trend xəbər verir ki, bu fikirləri Yasamal Rayon prokuroru Elman Süleymanov Yasamal Rayon Prokurorluğunun inzibati binasında keçirilən “Açıq qapı günü” və əmək hüquqlarına həsr olunmuş seminarda çıxışı zamanı deyib.
O bildirib ki, bəzi hallarda vətəndaşlar istehsalatda baş vermiş xəsarətlərlə bağlı hadisədən 6 ay və ya 1 il sonra aidiyyəti qurumlara müraciət edirlər.
“Belə hallarda xəsarətlərin və hadisənin təfərrüatlarının müəyyənləşdirilməsi çətinləşir. Buna görə də vətəndaşlar iş yerində baş vermiş xəsarət halları ilə əlaqədar müvafiq orqanlara vaxtında müraciət etməlidirlər”, – deyə prokuror vurğulayıb.
E.Süleymanov qeyd edib ki, əmək qanunvericiliyinin pozulması ilə bağlı bir sıra hallarda inzibati məsuliyyət nəzərdə tutulur.
Onun sözlərinə görə, işçilərin qanunvericilikdə müəyyən edilmiş müddətdən artıq işlədilməsi, eləcə də 15 yaşına qədər uşaqların əmək fəaliyyətinə cəlb olunması inzibati məsuliyyət yaradan hüquqpozmalardandır.
