Noyabrın 14-də Ağır Cinayətlərə Dair İşlər Üzrə Hərbi Məhkəmədə hakim Ağamalı Qafarovun sədrliyi ilə N saylı hərbi hissənin tağım komandiri Nemət Abbasovun və sıravi əsgərlər Alim Nəcəfovla Kamran Hüseynovun məhkəməsi başa çatıb. Trend məlumat verir ki, tağım komandiri həmin əsgərləri qeyri-qanuni yolla hərbi hissədən evə buraxmaqda təqsirləndirilib.
Məhkəmə yolu ilə müəyyən edilib ki, tağım komandiri Nemət Abbasov əsgəri məzuniyyətə buraxmaq səlahiyyətinin hərbi hissə komandirinə məxsus olduğunu bilə-bilə 8 may 2005-ci il tarixdə düşmənlə mövqedə döyüş növbəsində olarkən əsgərlər Kamran Hüseynovla Alim Nəcəfovu evə buraxıb. Əvəzində hərbi hissəyə qayıdarkən Kamran Hüseynovdan 170 min manat, Alim Nəcəfovdan isə 150 min manat gətirmələrini tələb edib.
10 may 2005-ci il tarixdə tağımın xidməti ərazisində baş vermiş mina partlayışından sonra tağım komandirinin qanunsuz hərəkətlərinin üstü açılıb və o, həbs olunub.
Məhkəmə işin bütün hallarını araşdırandan sonra Nemət Abbasovun 6 il müddətinə azadlıqdan məhrum edilməsinə dair hökm çıxarıb. Kamran Hüseynovla Alim Nəcəfov barəsində isə 2 il sınaq müddətinə cəza təyin edilib və hər iki müttəhim məhkəmə zalındaca azadlığa buraxılıb.