Milli Qəhrəman Albert Aqarunovun xatirəsinə həsr olunan beynəlxalq karate turniri keçirilir (FOTO)

İdman Materials 21 İyun 2018 18:48 (UTC +04:00)

Milli Qəhrəman Albert Aqarunovun xatirəsinə həsr olunan Qara Dəniz və Xəzəryanı ölkələr arasında karate üzrə beynəlxalq turnir keçirilir.

Bakı. Trend:

Ölkəmizdə multikulturalizmin, tolerantlığın qorunması, gənclərimizdə hərbi-vətənpərvərlik ruhunun yüksəldilməsi, Azərbaycanın suverenliyi, ərazi bütövlüyü və torpaqlarımızın azad olunması uğrunda şəhid olan qəhrəmanlarımızn təbliği məqsədilə Milli Qəhrəman Albert Aqarunovun xatirəsinə həsr olunan Qara Dəniz və Xəzəryanı ölkələr arasında karate üzrə beynəlxalq turnir keçirilir.

Trend-in məlumatına görə, beynəlxalq turnir Azərbaycan Silahlı Qüvvələrinin yaradılmasının 100 illiyi ərəfəsində, 21-23 iyunda "Sərhədçi" İdman Olimpiya Mərkəzində keçirilir.

Turnir Gənclər və İdman Nazirliyinin maliyyə dəstəyi, Milli Karate Federasiyası, "Arpaçay" karate klubu, Azərbaycan Dağ Yəhudiləri Dini İcması və Səbail Tank Taborunun birgə təşkilatçılığı ilə reallaşır.

Beynəlxalq turnirdə 10-a yaxın ölkənin nümayəndəsi iştirak edir. Turnirdə 5-13 yaş arasında uşaqlar, 14-18 yaşdan 30 yaşadək gənclər müxtəlif çəki dərəcəsində yarışacaqlar. Yarışın qalibləri Aqarunovun xatirəsinə həsr olunmuş xatirə medalları, kubok və diplomlarla mükafatlandırılacaqlar.

Qeyd edək ki, 2016-cı ildə Azərbaycan Silahlı Qüvvələrinin ildönümü ərəfəsində ordumuzun aprel zəfəri və Milli Qəhrəman A.Aqarunovun xatirəsinə həsr edilmiş Sumqayıtda karate üzrə şəhər birinciliyi, ötən il isə Beynəlxalq Şotokan Karate-Do üzrə filialın beşinci açıq çempionatı keçirilmişdi.

A.Aqarunovun xatirəsinə həsr olunmuş beynəlxalq turnir Gənclər və İdman Nazirliyinin, Milli Karate Federasiyasının təqvim planına salınaraq hər il keçirilməsi nəzərdə tutulub.

1991-ci ilin oktyabrında könüllü olaraq Milli Ordu sıralarına yazılan yəhudi əsilli 23 yaşlı A.Aqarunov ömrünün ən gözəl çağında silaha sarılaraq doğma vətəni Azərbaycanın müdafiəsinə qalxıb, Qarabağ, Şuşa uğrunda gedən qeyri-bərabər döyüşlərdə qəhrəmanlığı ilə ad-san qazanıb. Hələ sağlığında vətənpərvərliyi, qorxmazlığı, şücayəti ilə ad-san qazanan Albertin döyüş dostları onu böyük hörmət və ehtiramla "Şuşanın əfsanəsi" adlandırıblar.

A.Aqarunov 25 aprel 1969-cu il Bakının Əmircan qəsəbəsində anadan olub. Suraxanı rayonundakı 154 saylı məktəbin səkkizinci sinfini bitirərək peşə məktəbində sürücü-mexanik ixtisasına yiyələnib, 1987-ci ildə isə hərbi xidmətə çağırılıb və xidməti dövründə tank komandiri olub. Daha sonra Bakıya dönərək Suraxanıda Maşınqayırma zavodunda işləyib. Qarabağ müharibəsi başlayarkən 1992-ci ildə Albert Aqarunov könüllü olaraq cəbhəyə yollanıb. Tank komandiri təyin edilən Albert Aqarunov Şuşa cəbhəsində döyüşüb. O Xankəndi, Daşaltı, Cəmilli istiqamətində gedən döyüşlərdə erməni işğalçılarının xeyli canlı qüvvəsini, zirehli texnikasını məhv edib. Ermənilərin Şuşaya hücumu vaxtı Albert Aqarunov düşmənin 9 tank, 7 ZTR və bir çox texnikanı məhv edib.

A.Aqarunov 8 may 1992-cu ildə Şuşa uğrunda gedən döyüşlərdə snayper gülləsinə tuş gəlib və döyüş meydanında həlak olub.

A.Aqarunov ölümündən sonra Azərbaycan Respublikası Prezidentinin 7 iyun 1992-ci il tarixli, 833 saylı fərmanı ilə “Azərbaycanın Milli Qəhrəmanı” adına layiq görülüb. Bakıda Şəhidlər Xiyabanında dəfn edilib.