Konya. Trend:
Qadın cüdoçulardan ibarət Azərbaycan yığması V İslam Həmrəyliyi Oyunlarının bürünc medalını qazanıb.
Trend-in məlumatına görə, Azərbaycan idmançıları Leyla Əliyeva, Günel Həsənli və Səbinə Əliyeva Qırğızıstan komandasına 3:1 hesabı ilə qalib gəliblər.
Bundan başqa, cüdo üzrə kişilərdən ibarət Azərbaycan yığması da Oyunların qızıl medalını qazanıb. Finalda komanda türkiyəli idmançılarla qarşılaşıb.
Qeyd edək ki, V İslam Həmrəyliyi Oyunları Türkiyənin Konya şəhərində keçirilir. Yarışlar avqustun 18-dək davam edəcək.
Ümumilikdə İslam Həmrəyliyi Oyunlarında İslam Əməkdaşlıq Təşkilatına üzv olan 56 ölkənin idmançıları iştirak edir.
