...

“Meysəri” şərabları Azərbaycanın ixrac potensialının artırılmasına töhfə verəcək (FOTO)

İqtisadiyyat Materials 5 Oktyabr 2018 14:32 (UTC +04:00)
Şamaxının Meysəri kəndinin təbii iqlim şəraiti, illik yağıntıların miqdarı, temperatur göstəriciləri, ərazinin müxtəlif yerlərindən götürülən torpaq nümunələrinin Fransanın müvafiq laboratoriyalarında aparılan analizlərinin nəticələri burada yüksək keyfiyyətli və məhsuldar üzüm sortlarının yetişdirilməsinə imkanlar olduğunu göstərir
“Meysəri” şərabları Azərbaycanın ixrac potensialının artırılmasına töhfə verəcək (FOTO)

Bakı. Trend:

Ölkə iqtisadiyyatının qədim və ənənəvi sahələrindən olan üzümçülüyün elmi əsaslarla inkişaf etdirilməsi, daha məhsuldar üzüm sortlarının yetişdirilməsi, şərabçılıq məhsullarının keyfiyyətinin yüksəldilməsi istiqamətində görülən tədbirlər nəticəsində hazırda şərabçılıq sahəsi yeni inkişaf mərhələsinə keçib.

Avqustun 25-də Azərbaycan Respublikasının Prezidenti İlham Əliyevin iştirakı ilə açılışı olan “Şirvan şərabları” MMC-nin üzümçülük və şərabçılıq kompleksi də bu sahənin keçmiş şöhrətini özünə qaytarmaq, şərabçılıq turizminin inkişafına töhfəsini verməklə yanaşı, xarici bazarlarda layiqli yer tutmağı qarşıya məqsəd qoyub.

Trend-in məlumatına görə, ölkəmizdə ilk dəfə olaraq orqanik bioşərab istehsalı sahəsində ixtisaslaşan, üzüm tinglərinin əkilməsindən hazır şərabın istehlakçıya çatdırılmasına qədər bütün mərhələlərdə qabaqcıl texnologiyaları tətbiq edən, Avropa İttifaqı tərəfindən tanınan orqanik BIO və ISO 22000 - Qida Təhlükəsizliyinin İdarəolunması sertifikatlaşdırılması istiqamətində intensiv iş aparan müəssisədə illik 1,4 mln litr (1.866 mln şüşə) şərab istehsalı planlaşdırılır.

Şamaxının Meysəri kəndinin təbii iqlim şəraiti, illik yağıntıların miqdarı, temperatur göstəriciləri, ərazinin müxtəlif yerlərindən götürülən torpaq nümunələrinin Fransanın müvafiq laboratoriyalarında aparılan analizlərinin nəticələri burada yüksək keyfiyyətli və məhsuldar üzüm sortlarının yetişdirilməsinə imkanlar olduğunu göstərir. Yerli şəraitə uyğun tinglərin seçilməsi, əkilməsi, aqrotexniki qulluğun göstərilməsi, üzümün toplanması və emalı mərhələlərində Fransanın üzümçülük sahəsində ixtisaslaşmış şirkətlərinin mütəxəssisləri ilə daim məsləhətləşmələr aparılır. Bütün bunlar bazarda asanlıqla rəqabət apara biləcək yüksək keyfiyyətli şərab məhsullarının istehsalını şərtləndirən amillərdəndir.

Qeyd edək ki, “Şirvan şərabları” MMC-nin istehsal etdiyi “Meysəri” markası ilə “Sədəf” ağ turş, “Mərcan” qırmızı turş və “Məxməri” qırmızı turş premium şərab nümunələrinin Azərbaycan Respublikasının Qida Təhlükəsizliyi İnstitutunun sınaq laboratoriyasında aparılan keyfiyyət və təhlükəsizlik sınaqlarının nəticələri onların ölkəmizdə qüvvədə olan və dünyada qəbul olunmuş standartların tələblərinə uyğunluğunu təsdiq edib. Agentliyin müvafiq laboratoriyası sınaqların aparılmasında Fransanın BİPEA şirkətinin hazırladığı sertifikatlı referans materialından istifadə edib və bütün nəticələr həmin referans etalona uyğun təsdiqini tapıb.

Orqanik bioşərab istehsalı sahəsində müasir texnologiyaların tətbiqi, məhsulların keyfiyyət və təhlükəsizlik göstəricilərinin yerli və beynəlxalq standartların tələblərinə uyğunluğu, müəssisənin beynəlxalq sertifikatlaşdırılması sahəsində apardığı işlər “Şirvan şərabları” MMC-yə həm də qısa müddətdə rəqabət qabiliyyətli məhsulları ilə dünya bazarında nüfuz qazanmağa imkanlar yaradır.

Məqalədə:
Xəbər lenti

Xəbər lenti