Bakı. Trend:
Türkiyənin Qaradəniz bölgəsində tapılan 540 milyard kubmetrlik təbii qazın ixracatı üçün 170 kilometrlik boru kəmərlərinin çəkilişinə bu gündən etibarən başlanılıb.
Trend-in TurkicWorld-a istinadən məlumatına görə, çıxarılacaq qazın quruda emal edilməsi üçün nəzərdə tutulan “Filyos Təbii Qaz Emalı Qurumu”-nun da tikinti işləri davam edir.
Qeyd edək ki, ilk olaraq Sakarya Qaz Sahəsində dənizin altında qurulacaq hasilat sisteminə 6-10 quyu birləşdiriləcək və bu quyulardan gündəlik 10 milyon kubmetr qaz hasil edilərək 2023-cü ildə Türkiyənin təbii qaz şəbəkəsinə veriləcək. Qara dənizdə ən yüksək hasilat səviyyəsinə 2027-2028-ci illərdə çatacağı gözlənilir. Bu dövrdə gündəlik 40 milyon və illik isə təxminən 15 milyard kubmetr təbii qazın hasil edilməsi gözlənilir.