Bakı. Trend:
“Masdar” şirkətinin Azərbaycanda həyata keçirdiyi layihələrin ümumi portfeli 2027-ci ilə qədər 1,2 giqavattı ötəcək.
Trend xəbər verir ki, bunu “Masdar”ın Azərbaycandakı nümayəndəliyinin rəhbəri Murad Sadıxov Bakıda keçirilən 30-cu yubiley “Xəzər Neft və Qaz” (Caspian Oil and Gas) beynəlxalq sərgisi çərçivəsində təşkil olunmuş "Enerji sənayesində davamlılıq" mövzusunda panel müzakirəsində deyib.
“Biz Azərbaycana 2018-ci ildə Energetika Nazirliyinin elan etdiyi tenderdə iştirak etmək məqsədilə gəlmişik. 2021-ci ildə ofisimizi açdıq və artıq ölkədə beşinci ildir fəaliyyət göstəririk. Bizim ilk layihəmiz 230 MVt gücündə “Qaradağ” günəş elektrik stansiyası oldu — bu, Azərbaycanda kommunal miqyaslı ilk layihədir. Hazırda tərəfdaşımız “SOCAR Green” ilə birlikdə daha iki layihənin inşasına başlamışıq və eyni zamanda, 240 MVt gücündə "Abşeron-Qaradağ" külək elektrik stansiyası layihəsini hazırlayırıq”, - deyə o bildirib.
Sadıxov vurğulayıb ki, Azərbaycan təkcə faydalı qazıntılara investisiya üçün deyil, həm də bərpa olunan enerji sahəsinə yatırımlar baxımından da cəlbedici ölkədir.