Bakı.Trend:
Azərbaycan və Tacikistan ixrac-investisiya əlaqələrini möhkəmləndirməklə və iki ölkənin sahibkarlıq strukturları arasında qarşılıqlı fəaliyyəti genişləndirməklə iqtisadi əməkdaşlığı inkişaf etdirməyə davam edir.
Trend xəbər verir ki, bu barədə Azərbaycan Respublikasının İxracın və İnvestisiyaların Təşviqi Agentliyinin (AZPROMO) direktoru Yusif Abdullayev Bakıda keçirilən Azərbaycan-Tacikistan biznes forumu çərçivəsində bildirib.
O qeyd edib ki, Azərbaycan və Tacikistan arasında iqtisadi əməkdaşlığın koordinasiyası ikitərəfli münasibətlərin inkişafında mühüm rol oynayan hökumətlərarası mexanizmlər vasitəsilə həyata keçirilir.
Y.Abdullayev vurğulayıb ki, tərəflər artıq birgə təşəbbüslərin həyata keçirilməsi üzrə müsbət təcrübəyə malikdir və biznes üçün yeni imkanların yaradılmasına yönəlmiş əməkdaşlıq formatlarını genişləndirməyə davam edirlər.
AZPROMO rəhbəri bildirib ki, agentlik ixracatçılara ixrac missiyaları, beynəlxalq sərgilərdə iştirak, milli brendin təşviqi, bazar araşdırmaları və beynəlxalq sertifikatların əldə olunmasına dəstək daxil olmaqla kompleks alətlər vasitəsilə yardım göstərir.
O, xüsusilə Mərkəzi Asiya ölkələri ilə əməkdaşlığın əhəmiyyətini vurğulayaraq, bu regionda Azərbaycanın ticarət nümayəndəliyinin iqtisadi əlaqələrin genişləndirilməsində roluna diqqət çəkib.
Qeyd edək ki, bu gün Bakıda iki ölkənin dövlət qurumları və işgüzar dairələrinin nümayəndələrinin iştirakı ilə Azərbaycan-Tacikistan biznes forumu keçirilir. Forum çərçivəsində ticarət-iqtisadi əməkdaşlığın genişləndirilməsi perspektivləri, investisiya imkanları, sənaye kooperasiyası və Azərbaycan ilə Tacikistan sahibkarları arasında əlaqələrin inkişafı müzakirə olunur.
