Bakı. Trend:
Gənclər inkişaf üçün ən böyük imkanlardan birini təmsil edir.
Trend-in tədbirdə iştirak edən müxbirinin məlumatına görə, bunu Bakıda İslam İnkişaf Bankı Qrupunun (IsDB) İllik Toplantısı çərçivəsində keçirilən “Sərhədsiz gənclik: ümumi regional rifahın təmin edilməsi” mövzusunda tədbirdə Azərbaycanın maliyyə nazirinin birinci müavini Anar Kərimov deyib.
“İslam İnkişaf Bankının bütün üzv ölkələrində milyonlarla gənc inkişaf üçün ən böyük imkanlardan birini təmsil edir.
Lakin imkanlar öz-özünə yaranmır. Onları yaratmaq, inkişaf etdirmək və maliyyələşdirmək lazımdır. Bundan başqa, bu imkanlar milli sərhədləri aşmalıdır, çünki istedad və innovasiyalar sərhəd tanımır.
Azərbaycanda biz gənclərə inanır və gəncləri milli inkişafa strateji investisiya kimi qiymətləndiririk”, - deyə nazir müavini bildirib.
Kərimov qeyd edib ki, son beş il ərzində Azərbaycan gənclərin təhsilinə təxminən iki milyard ABŞ dolları yönəldib.
“İslamda təhsil sadəcə iqtisadi investisiya deyil. Bu, insan ləyaqətinə, məsuliyyətə və cəmiyyətə xidmətə qoyulan investisiyadır.
Buna görə də bu gün Azərbaycanda biz hesab edirik ki, gənclərə investisiya qoyuluşu gənc sahibkarlara investisiya qoyuluşudur. Onların daha böyük bazarlara çıxışa, daha geniş mobilliyə ehtiyacı var, innovatorlar üçün isə daha güclü qarşılıqlı əlaqə şəbəkələri lazımdır”, - deyə o bildirib.
