Azərbaycan, Bakı/ Trend , müxbir İ.Xəlilova/ Oktyabrın 20-22-də Vaşinqtonda Dünya Bankı (DB) və Beynəlxalq Valyuta Fondu (BVF) idarəçiləri Şurasının görüşü keçiriləcək. Bazar ertəsi DB Bakı nümayəndəliyinin rəhbəri Qreqori Yedjeyçakın verdiyi məlumata görə, görüşdə Azərbaycandan ölkə üzrə idarəçi, maliyyə naziri Samir Şərifov iştirak edəcək.
Yedjeyçak söyləyib ki, səfər zamanı nazir güzəştli maliyyə layihələri çərçivəsində, gələcək əməkdaşlıq mövzusunda DB nümayəndələri ilə danışıqlar aparacaq. DB sosial yöndə və bank sahəsi üzrə layihələr siyahısı təqdim edib. Hökumət isə, növbəti illərdə Beynəlxalq İnkişaf Assosiasiyasının (BİA) xətti ilə güzəştli kreditlər hesabına maliyyələşdirilməsi mümkün olacaq layihələr hesabına öz portfelini formalaşdırır.
DB nümayəndəsinin sözlərinə görə, bu görüşdə həmin siyahıdan güzəştli maliyyələşdirilməyə düşə biləcək layihələr konkretləşdiriləcək. Bu siyahıda Azərbaycanın maliyyə sektorunun müasirləşdirilməsi, təhsil sahəsində islahatlar təklifi, özəl pensiya fondu sisteminin yaradılması ilə bağlı və s. layihələr var.
Azərbaycan hökuməti ilə 2007-10-cu illər üçün nəzərdə tutulmuş yeni tərərfdaşlıq strategiyası çərçivəsində DB ölkələrinin BİA xətti ilə güzəştli kreditlərlə maliyyələşdirilməsini dayandırmaq və bu vəsaitləri daha kasıb ölkələrə, xüsusilə Afrika ölkələrinə yönəltmək niyyətindədir.
Adambaşına ÜDM 1280 dolları ötməyən ölkələr bu meyara daxil olanlardır. Azərbayacan artıq DB tərəfindən BİA kreditlərini almaq üçün meyar kimi müyyən olunan bu gəlir səviyyəsini ötüb keçib.
Yedjeyçakın sözlərinə görə, Azərbaycan üçün əlavə maliyyələşdirmə həcmi, hələ ki, müəyyən olunmayıb, "bu, daha çox hökumətdən asılıdır, bank isə modelləşdirmədə kömək edir".