Azərbaycan, Bakı, 02 may/ Trend , müxbir İ.Xəlilova/ Azərbaycanın Türkmənistana olan borcunun tam ödənilməsi üçün ölkə hökuməti 2008-ci il dövlət büdcəsinin parametrlərinin dəqiqləşdirilməsi çərçivəsində, 36 mln. manat əlavə vəsait ayırıb. Bu barədə cümə günü Azərbaycanın maliyyə naziri Samir Şərifov parlamentdə yenilənmiş dövlət büdcəsi parametrlərinin müzakirəsi zamanı bildirib.
Borc öhdəlikləri və maliyyə tələblərinin nizamlanması haqqında Hökumətlərarası sazişə əsasən, Azərbaycanın Türkmənistana olan borcu $44,8 mln. təşkil edir. Borc 1991-92-ci illərdə, türkmən qazının alınması nəticəsində yaranıb.
Sazişə əsasən, Azərbaycanın $44,8 mln. məbləğində bütün borcunun birdəfəli qaydada ödənilməsinə dair razılıq əldə edilib. Borc ilin sonunadək, nəqd pulla ödəniləcək. Belə ki, hazırki şəraitdə (bir çox dövlət müəssisələri özəl mülkiyyətə keçib) mal tədarükü haqqında danışmaq mümkün olmayacaq. [Rəsmi Bakı əvvəllər bildirirdi ki, ölkənin türkmən qazının alınmasına görə $18 mln borcu var. Türkmənistan isə, hesablanmış faizlər nəzərə alınmaqla, $56 mln.-a təkid edirdi].
Türkmən tərəfi bu vəsaitləri təhsil sahəsində islahatlar çərçivəsində kompüter və multimedia avadanlığının alınmasına yönəltməyi planlaşdırır.
Mayın 2-ə olan rəsmi məzənnə - 0,829 AZN/USD.
Müəlliflə əlaqə saxlamaq üçün elektron ünvan: [email protected]
