Azərbaycan, Bakı, 19 iyul/ Trend , müxbir Ü.İsmayılova/ Bakıda mənzil təmiri orta hesabla mənzilin özünün dəyərinin yarısına başa gəlir. Daşınmaz əmlakın bir kvadrat metrinin kosmetik təmiri hazırda orta hesabla 250 manat, orta təmiri - 450 manat, kapital təmiri isə - 1,7 min manata başa gəlir. Bu barədə şənbə günü MBA Group konsaltinq şirkətinin Baş direktoru Nüsrət İbrahimov məlumat verib.
Təmir xərcləri daşınmaz əmlakın yerləşdiyi yerdən asılı olaraq dəyişir. Şəhərin kənarlarında qiymətlərin daha aşağı olmasına görə mənzilin təmiri ucuz başa gəlir. Burada bir kvadrat metr mənzilin qiyməti təqribən 500 manatdır. Mərkəzə yaxın bir kvadrat metr mənzilin qiyməti orta hesabla bir min manat, şəhərin mərkəzində elit evlərdə isə kvadrat metrinə görə 3,5 min manatdır.
Tikintinin qiymətində tikinti materiallarının xüsusi çəkisi 47 faizdir.
Konsaltinq şirkətinin monitorinqinin yekunlarına əsasən iyunda Bakıda tikinti materiallarının qiyməti 1,9 faiz azalıb, ilin əvvəlindən qiymətlər 16,8 faiz, 2007-ci ilin analoji dövrü ilə müqayisədə isə 29,8 faiz artıb. Bazarda yerli istehsal tikinti materiallarının payı 41,4 faiz təşkil edib.
MBA Group 2008-ci ilin martında yaradılıb.
Müəlliflə əlaqə saxlamaq üçün elektron ünvan - [email protected]