Azərbaycan, Bakı, 31 iyul / Trend , müxbir E.İsmayılov/ Azərbaycan Dövlət Dəmir Yol İdarəsi cari il ərzində təqribən 30 mln.ton müxtəlif tipli yük daşımağı planlaşdırır. Bu göstərici 2007- ci ildə 28 mln. ton təşkil edib. Bu barədə cümə axşamı Azərbaycan Dövlət Dəmir Yol İdarəsinin baş mühəndisi Qurban Nəzirov bildirib.
"Bu il üçün 30 mln. ton yükün daşınması planlaşdırılıb, hələ ki, işlər plana müvafiq gedir", - deyə Nəzirov bildirib.
Baş mühəndis qeyd edib ki, yük daşımalarının ümumi həcmindən təqribən 14 mln. tonu neftin, 16 mln. tonu quru yüklərin payına düşəcək.
Azərbaycan Dövlət Statistika Komitəsinin məlumatına görə, 2008 -ci ilin yanvar-iyun aylarında dəmir yolu nəqliyyatı vasitəsilə 13,8 mln. ton müxtəlif tipli yük daşınıb. Bu, 2007-ci ilin analoji dövr göstəricisindən 1,8 faiz azdır.
Ümumilikdə yanvar-iyun ayları ərzində Azərbaycanın nəqliyyat sektoru vasitəsilə 90,2 mln. ton müxtəlif tipli yük daşınıb ki, bu da 2007-ciilin müvafiq dövr göstəricisi ilə müqayisədə 13,2 faiz çoxdur.
Daşınan yüklərin ümumi həcmindən 68,6 faiz özəl sektorun payına düşüb. Yanvar-iyun ayları ərzində daşınan yüklərin ümumi həcmindən 45,6 faiz avtomobil nəqldiyyatı, 32,7 faiz boru kəməri (O cümlədən 20,2 faiz Bakı - Tbilisi - Ceyhan və 1,7 faiz Cənubi Qafqaz qaz kəməri ilə), 15,3 faiz dəmir yolu, 6,4 faiz isə dəniz nəqliyyatı vasitəsilə daşınıb.
Məqalə müəllifi ilə əlaqə ünvanı [email protected]
