Gürcüstan, Tbilisi, 27 oktyabr/ Trend , müxbir N.Kirtsxaliya/ ABŞ Gürcüstan şirkətlərinin Amerika bazarına girişini təmin etmək niyyətindədir. Bu barədə bazar ertəsi Tbilisidə keçirilən Gürcüstan-ABŞ biznes-sammitində ticarət nazirinin müavini Con Sallivan bildirib.
"ABŞ Gürcüstana təkcə maliyyə yardımı göstərməyə deyil, həmçinin stabilliyin və inkişafın təmin edilməsi üçün onunla digər sahələrdə əməkdaşlıq etməyə də hazırdır", - deyə Sallivan bildirib.
ABŞ Gürcüstana bir mlrd. dollar həcmində yardım ayırıb, bu məbləğin 370 mln. dolları bu il dövlət büdcəsinə köçürüləcək.
Sallivan bildirib ki, güzəştli şərtlər ilə Amerika bazarına daxil olacaq gürcü məhsullarının siyahısının genişləndirilməsi ilə məşğul olan ticarət missiyası yaradılıb.
"Biz intellektual məhsulların müdafiəsi, məhkəmə mübahisələrinin həlli prosedurunun təkmilləşdirilməsi, çaxırın keyfiyyətinin yaxşılaşdırılması məsələlərində Gürcüstana kömək edəcəyik", - deyə ticarət nazirinin müavini bildirib.
