Azərbaycan, Bakı, 25 noyabr/ Trend , müxbir N.İsmayılova/ Bu gün Azərbaycan Milli Bankı (AMB) və ABŞ Beynəlxalq İnkişaf Agentliyi (USAİD) arasında dəyəri 4,75 mln. dollar olan maliyyə sektorunun sabitliyinin dəstəklənməsi proqramı çərçivəsində, birgə maliyyələşdirmə memorandumu imzalanıb. Proqram iki ilə hesablanıb.
"Ölkənin maliyyə sektorunun dəstəklənməsi dünya maliyyə böhranı şəraitində daha aktualdır və uzunmüddətli xarakter daşıyacaq", - AMB İdarə Heyətinin sədri Elman Rüstəmov çərşənbə axşamı imzalama mərasimində bildirib.
Onun sözlərinə görə, proqram, əsasən, monetar siyasətin, bank sektorunun möhkəmləndirilməsinə və informasiya texnologiyalarının gücləndirilməsinə, nəqd pulların idarəsinin təkmilləşdirilməsinə yönəldiləcək ki, bu da yeni istiqamət olacaq.
Proqramın əsas məqsədi risk menecmentin, insan ehtiyatları və informasiya texnologiyalarının idarə edilməsinin gələcək möhkəmləndirilməsi, AMB-nin makromaliyyə təhlili potensialının təkmilləşdirilməsidir.
Ümumi maliyyələşdirmə həcmindən 4 mln. dollar USAİD, 750 min dollar AMB tərəfindən ayrılacaq. Azərbaycan tərəfdən memorandumu AMB-nin rəhbəri Elman Rüstəmov, USAİD tərəfdən - ABŞ-ın xarici ölkələrə yardım göstərməsi üzrə departamentin direktoru Henrietta For imzalayıb.
Forun sözlərinə görə, bu memorandum Azərbaycan Milli Bankı ilə gələcək əməkdaşlıq üçün başlanğıcdır.
Müəlliflə əlaqə saxlamaq üçün elektron ünvan - [email protected]
