Azərbaycan, Bakı, 05 fevral / Trend , müxbir S.Babayeva/ "2008-ci ildə Naxçıvan Muxtar Respublikasında (NMR) Ümumi Daxili Məhsul (ÜDM) ötən ilə nisbətən 35,5 faiz artaraq təxminən 796 milyon manata çatıb", - NMR-in Bakıdakı daimi nümayəndəliyindən məlumat verilib.
Bu dövr ərzində ÜDM-in 43,9 faiz və ya 349 milyon manatı məhsul istehsalının payına düşüb. Xidmət sahəsində əlavə dəyər 408 milyon manat təşkil edib (xüsusi çəki ilə 51,2 faiz). Məhsul və idxaldan əldə olunan xalis vergilər isə ÜDM-in 4,9 faizini və ya 39 milyon manat təşkil edib.
Ötən il ərzində sənaye sahəsində ÜDM-in 13,8 faizi (110 milyon manat), kənd təsərrüfatında - 13,2 faizi (105,1 milyon manat), tikintidə - 16,9 faizi (135 milyon manat), nəqliyyatda - 3,1 faizi (25 milyon manat), rabitə sektorunda - 2,3 faizi (18,3 milyon manat), topdan və pərakəndə satış, həmçinin avtomobil, müxtəlif məişət əşyalarının təmiri sahəsində - 26,3 faizi (209,3 milyon manat) həcmində əlavə dəyər olub.
Məqalə müəllifi ilə əlaqə ünvanı: [email protected]