...

2004-2008-ci illərdə Azərbaycanda orta illik yükdaşıma həcmi təqribən 12 faiz artıb

Biznes və iqtisadiyyat xəbərləri Materials 12 Mart 2009 16:29 (UTC +04:00)

Azərbaycan, Bakı, 12 mart / Trend /

2004-2008-ci illərdə Azərbaycanda nəqliyyatın müxtəlif növləri üzrə yükdaşıma həcmində artım orta hesabla 11,76 faiz (741,8 mln. ton) təşkil edib. Bu göstərici sərnişin daşımalarında 6,82 faizə (5,4 mlrd. nəfər) bərabər olub. Bu barədə Nazirlər Kabinetinin 2008-ci il ərzində fəaliyyət barədə hesabatında bildirilir.

2008-ci ildə müxtəlif nəqliyyat vasitələri ilə reallaşdırılan yük daşımalarının ümumi həcmi 2003-cü ildə qeydə alınan 110 mln. tona nisbətdə 183 mln. ton (66,4 faiz artım) təşkil edib. 

2008-ci ildə boru kəmərləri ilə yük daşımaları artımı 2003-cü il ilə müqayisədə 3,2 dəfə artıb (neft kəmərləri ilə artım 3,9 dəfə, qaz kəmərləri ilə 89,3 faiz təşkil edib).

Ümumilikdə 2008-ci ildə dəmiryolu ilə 2003-cü ilin 20,3 mln. tonuna nisbətdə təqribən 27,4 mln. ton yük (artım 34,6 faiz təşkil edib) daşınıb. 2008-ci ildə avtomobil nəqliyyatı ilə yük daşımaları 2003-cü ilə nisbətdə 48,9  faiz artıb.

Ötən il dəmiryolunun inkişafına 16,1 mln. manat həcmində sərmayə ayrılıb. Bu vəsaitlərə 6 lokomotiv alınıb, 13 kilometrlik dəmiryolu, 13 lokomotiv və 857 ədəd vaqon, həmçinin iki elektrik qatarı əsaslı təmir edilib. 2004-2008-ci illərdə dəmir yolunun inkişafına yatırılan sərmayələrin ümumi həcmi 66,3 mln. manat təşkil edib.

Hava nəqliyyatının inkişafına ötən il 120,4 mln. dollardan artıq vəsait ayrılıb. Ayrılan vəsaitlər hesabına iki ATR markalı təyyarə alınıb, Lənkəran və Zaqatalada yerləşən aeroportlar təmir olunaraq istismara verilib. Zığda quru yüklər üçün liman tikintisi üzrə işlərə başlanıb, tikinti işlərinin 2009-cu ildə başa çatdırılması planlaşdırılır. Beş il ərzində sərnişin daşımaları üzrə orta illik artım 9,98 faiz təşkil edib (6,6 mln. sərnişin daşınıb). 2008-ci ildə 2003-cü il ilə müqayisədə sərnişin daşıma üzrə artım 60,8 faiz təşkil edib.

Ümumilikdə beş il ərzində yatırılan 160 mln. manat həcmində sərmayələr hesabına Dövlət Xəzər Dəniz Gəmiçiliyi tərəfindən yükgötürmə gücü 90 min ton olan yeddi yeni tanker və 52 vaqonluq yerə malik iki bərə alınıb.

2008-ci ildə Azərbaycanın avtonəqliyyat sektorunda Almaniya, Koreya, Çin və Belarus istehsalı olan 948 ədəd iri və orta tutumlu avtobuslar istismara verilib. Dövlət büdcəsindən ayrılan vəsaitlər hesabına alınan avtobuslardan 135 ədədi iritutumlu nəqliyyat vasitələrinin payına düşüb.

2008-ci ildə yük və sərnişin daşıyan nəqliyyat vasitələrinə təqribən 371 min fərqləndirici nişan (vergi tutan) verilib, nəticədə dövlət büdcəsinə yeddi mln. manat ödənilib.

Həmçinin 2008-ci il ərzində ölkənin şəhər, rayon, kənd və qəsəbələri arasında 803 kilometrlik yolun əsaslı və orta təmiri həyata keçirilib. Ötən il avtomobil yollarının yenidənqurulması və tikintisinə yatırılan sərmayələrin ümumi həcmi təqribən 1,4 mlrd. manat təşkil edib.

Beş il ərzində Bakıda avtomobil yolları şəbəkəsinin qorunub saxlanılması, yenidən qurulması, orta və cari təmiri, avtomobil körpülərinin yenidən qurulması və əsaslı təmiri, yol ötürücüləri və piyada keçidlərinin tikintisinə 2,4 mlrd. manatdan çox vəsait sərf olunub. Bu məbləğin 2,05 mlrd. manatı dövlətin kapital yatırımları və beynəlxalq maliyyə institutlarının payına düşüb.

2008-ci ildə Bakı metropoliteninə 151,8 mln. manat sərmayə yatırılıb. Bu sərmayələr "Nəsimi" metro stansiyasının tikintisi, "İçəri şəhər" metro stansiyasının yenidən qurulması, "Xətai" metro stansiyasında ikinci yolun tikintisi və 36 yeni vaqonun alınmasına yönəldilib.

2004-2008-ci illərdə Bakı metropoliteninin inkişafına 247,3 mln. manat sərf olunub. Bu dövr ərzində metropoliten üçün 111 ədəd vaqon alınıb. Göstərilən dövrdə sərnişindaşıma üzrə orta artım 9,64 faiz (821 mln. sərnişin daşınıb) təşkil edib.

Xəbər lenti

Xəbər lenti