Azərbaycan, Bakı, 18 may / Trend , müxbir İ.Xəlilova /
KfW (Almaniya İnkişaf Bankı) Cənubi Qafqaz regionuna xidmət göstərmək üçün Tbilisidə Almaniya Əməkdaşlıq Evi açıb. Rəsmi açılış mərasimi mayın 1-də baş tutub. Bu barədə bankın Bakı ofisinin rəhbəri Natiq Abdullayev bazar ertəsi deyib.
"Sözügedən Evin açılması ilə bank əməliyyatları Tbilisidən nizamlanacağı üçün KfW ofisinin Azərbaycanda nümayəndəliyə transformasiya edilməsi vacibliyi gündəmdən düşür", - Abdullayev qeyd edib.
Azərbaycanla KfW-nin əməkdaşlığı 1994-cü ildən başlayıb. Bankın ölkədə fəaliyyətinin strateji istiqamətləri enerji, su və digər infrastrukturların bərpası, maliyyə və bank, özəl, səhiyyə sahəsinin inkişafına dəstək, eləcə də ətraf mühitin qorunmasından ibarətdir. Azərbaycan üzrə bankın portfeli 187 milyon avro təşkil edir.
Azərbaycanla əməkdaşlığın ilk günlərindən KfW layihələrin güzəştli maliyyələşdirilməsinə üstünlük versə də, son zamanlar bank qarışıq kreditlərə üstünlük verir.
Məqal müəllifi ilə əlaqə ünvanı: [email protected]
