Azərbaycan, Bakı, 22 may / Trend , müxbir N.İsmayılova /
"Bu il ərzində ADA Group-un operatoru olduğu "Almalı" mağazalarının yeni çeşid xətləri yaradılacaq və onların coğrafiyası genişləndiriləcək", - cümə günü ADA Group direktorlar şurasının sədri Sergey İvaşkeviç deyib.
"Biz artıq beş müxtəlif kateqoriyalar üzrə 20 çeşid növü istehsal edirik. Yaxın zamanda quraşdırılacaq müasir sexlər vasitəsilə biz öz istehsal gücümüzü artıracağıq", - İvaşkeviç deyib.
Onun sözlərinə görə, rəhbərlik tərəfindən şəxsi istehsalın inkişaf etdirilməsi qərarı qəbul edilib. Şəxsi istehsal məhsullarının yeni çeşidi qrupun idarə heyəti tərəfindən artıq mövcud konsepsiya üzrə hazırlanacaq.
"Payıza qədər qrupun sıfırdan inkişaf etdirmək niyyətində olduğu məhsulların adları müəyyən ediləcək. Həmçinin tanınmış istehsalıçıların da buna cəlb edilməsi planlaşdırılır. ADA Group isə məhsulun keyfiyyətinə nəzarət edəcək", - İvaşkeviç bildirib.
ADA Ticaret-in idarə heyətinin sədri Rafael Hacıyevin sözlərinə görə, ilin sonuna qədər daha beş "Almalı" mağazası açılacaq.
"Bizim əsas məqsədimiz şəbəkənin ölkənin regionlarında inkişafıdır. Şirvan, Mingəçevir, Yevlax və Tovuzda mağazaların açılması imkanı nəzərdən keçirilir", - Hacıyev deyib.
Hazırda 40 "Almalı" mağazası Azərbaycanın üç şəhərində fəaliyyət göstərir. Onlardan 35-i Bakıda, üçü Sumqayıtda, ikisi Gəncədə və bir paylama mərkəzi Xırdalanda fəaliyyət göstərir.
Məqalə müəllifi ilə əlaqə ünvanı: [email protected]
