Azərbaycan, Bakı, 26 avqust / Trend , Ü.İsmayılova /
"Böyük Bakı" regional inkişaf baş planı paytaxtda bəzi binaların və tikililərin sökülməsinə səbəb olacaq. Bu barədə çərşənbə günü Azərbaycan Dövlət Şəhərsalma və Arxitektura Komitəsinin şəhərsalma şöbəsinin müdiri Yusif İbrahimli deyib.
"Belə qərar şəhərsalma normalarına uyğun gəlməyən tikililərə aid ediləcək", - İbrahimli deyib.
Onun sözlərinə görə, hazırda Bakıda tikililərin əksəriyyəti şəhərsalma normalarının tələblərinə uyğun gəlmir. Bu da insanların və nəqliyyat vasitələrinin hərəkəti zamanı daimi tıxaclara və problemlərə gətirib çıxarır.
" "Böyük Bakı" regional inkişaf planı bu gün şəhər əhalisinin rastlaşdığı problemlərin əksəriyyətini mütləq həll edəcək", - İbrahimli deyib.
Azərbaycan Dövlət Şəhərsalma və Arxitektura Komitəsi artıq "Böyük Bakı" regional inkişaf baş planının hazırlanmasına dair tender elan edib, nəticələr bu həftə elan olunacaq.
Tenderdə iştirak üçün dünyanın 21 ölkəsindən 34 şirkət ərizə təqdim edib. Onlardan tenderə 6 qrup şirkət buraxılıb:
AS&P Albert Speer & Partners GmbH (Almaniya);
Moshe Zur Architects Town Planners Ltd., Marmanet organization & Projects, Management International Ltd.,Geoda Geographical Data, Landed Property, Mapping and Surveying Ltd. (İsrail);
EDAW, AECOM (ABŞ);
HOK (Hellmuth, Obata and Kassabaum) Inc., Development Planning Unit, (İngiltərə), Shaw Consultants International (ABŞ), Scott Wilson (Az. Office) (İngiltərə);
GHK Consulting (İngiltərə), International Land System Inc.(ABŞ), Synergetics Ltd. (Azərbaycan);
Urban Solutions (Hollandiya), Hansen Partnership (Avstraliya), Bakı Dövlət Layihə İnstitutu (Azərbaycan).
Tender proseduru Beynəlxalq Yenidənqurma və İnkişaf Bankının (DB qrupuna daxil) dəstəyi ilə keçirilir. Tenderin şərtlərinə görə, plan iki il ərzində hazırlanacaq.
Plan "Böyük Bakı" adlandırılıb. Bakının köhnə planı qrafik prinsiplərini və paytaxtın 22 min hektar ərazisinin konsepsiyasını əhatə edirdi. Paytaxtın real ərazisi 219 min hektardan çoxdur.
Bakı şəhərinin sonuncu baş planı 1987-ci ildə qəbul edilib. Artıq bir ildir ki, Azərbaycan hökuməti tərəfindən, yəni Dövlət Şəhərsalma və Arxitektura Komitəsi tərəfindən DB-nin krediti hesabına "Böyük Bakı" regional inkişaf planının hazırlanması üzrə layihə həyata keçirilir. Bu layihə özündə Bakı və Sumqayıtın, eləcə də Abşeron rayonunun yaxın 20 ilə perspektiv inkişafını əks etdirir. Belə layihələr Şərqi Avropanın bir sıra ölkələrində həyata keçirilib. Lakin onların heç biri paytaxtı şəhərətrafı regionla və 3 milyondan çox əhali ilə əhatə etməyib. Layihədə yeni texnologiyalar, məsələn, coğrafi-informasiya sistemi və s. tətbiq olunacaq.
Məqalə müəllifi ilə əlaqə ünvanı: [email protected]
