Azərbaycan, Bakı, 06 noyabr / Trend , müxbir İ.Xəlilova/
2009-cu ildə Beynəlxalq Maliyyə Korporasiyasının (BMK) Azərbaycan üzrə porfelinin 40-50 milyon dollar səviyyəsində olacağı gözlənilir. Bu barədə BMK-nın Azərbaycandakı nümayəndəsi Aliyə Əzimova deyib.
2008-ci ilin yekunlarına görə, korporasiya maliyyə sektoruna 50 milyon dollar investisiya yatırıb. Bu il ticari maliyyələşmənin, kiçik və orta sahibkarlığın inkişafına dəstək məqsədilə üç bankdan kredit xəttinin açılması planlaşdırırlır. Kredit müqavilələrindən biri - 20 milyon dollarlıq kredit müaviləsi Bank Respublika ilə bağlanıb.
"Maliyyə sektorundan əlavə, iqtisadiyyatın real sektorunda layihələrin maliyyələşməsinə də önəm veririk və yerli investorlarla sıx əməkdaşlıq edirik", - Əzimova deyib.
BMK kənd məhsulları istehsalı sahəsində (o cümlədən broyler məhsullarının), xidmətlər və özəl tibb sahəsində layihələrin maliyyələşdirilməsi imkanlarını gözdən keçirir.
"Əhaliyə keyfiyyətli xidmət göstərilməsi baxımından tibb sahəsi çox mühüm əhəmiyyət kəsb edir. Buna görə də bu sahədə qabaqcıl şirkətləri dəstəkləyirik", - Əzimova bildirib.
Onun sözlərinə görə, maliyyə korporasiyası bütün layihələr üzrə ayrı-ayrı komponentləri formalaşdırır. Korporativ idarəetmənin inkişafı layihəsi çərçivəsində özəl müştərilər və hökumət nümayəndələri ilə əlaqələrin yoluna qoyulması üzrə bir sıra tədbirlər həyata keçirilir, treninqlər və maarifləndirmə işləri təşkil edilir. Bundan əlavə, korporasiya iqtisadiyyatın qeyri-neft sektorunun inkişafı üzrə və onun davamlı inkişafının təmin ediləsi üçün Azərbaycanın prioritetlərini nəzərə alaraq, biznes mühitinin təkmilləşdirilməsi çərçivəsində ölkə hökuməti ilə sıx əməkdaşlıq edir.
Əzimovanın sözlərinə görə, hazırda menecment riskləri sahəsində, ən əsası isə ölkədə özəl kredit bürolarının inkişafını nəzərdə tutan, menecment riskləri sertifikasiya sisteminin tətbiqi və bank sektorunda kredit portfellərinin keyfiyyətinin yaxşılaşdırılması proqramının hazırlanması sahəsində bir sıra layihələrin realizəsi müzakirə edilir.
Məqalə müəllifi ilə əlaqə ünvanı: [email protected]