Azərbaycan, Bakı, 21 yanvar / Trend , müxbir N.İsmayılova/
2010-cu il yanvarın 1-nə olan vəziyyətə görə, Azərbaycanda işsizlər qismində 41,6 min nəfər rəsmi qeydiyyatdan keçib ki, onlardan 44%-i qadındır. Bu barədə çərşənbə günü Dövlət Statistika Komitəsindən məlumat verilib. Keçən il ərzində işsizlərin sayı 7,6 faiz azalıb. Ölkədə 1 vakant yerə 4 işsiz iddialıdır.
Hesabat dövrü ərzində ölkənin məşğul əhalisi 4331,8 min nəfər təşkil edib. Bununla yanaşı, ötən ilin yanvar-noyabr aylarında muzdla işləyənlərin sayı 1375,4 min nəfər olub.
İstehsalat sahələrində muzdla işləyənlərin 12%-i sənaye sahəsində, 4,9%-i tikintidə, 2,8%-i kənd, meşə təsərrüfatı və balıqçılıqda çalışır. Xidmətlər sahəsində işləyənlərin 25,5%-i təhsil sahəsində, 19,8%-i topdan və pərakəndə ticarətdə, avtomobillərin, məişət məhsullarının və şəxsi istifadə üçün əşyaların təmirində, 10,2%-i səhiyyə və sosial xidmətlərdə, 6,7%-i nəqliyyatda, 6,3%-i kommunal sosial və şəxsi xidmət sahələrində, 5%-i daşınmaz əmlak, icarə əməliyyatlarında, 4,1%-i dövlət idarəsi və müdafiəsi sahəsində, 2,7%-i isə başqa sahələrdə cəmlənib.
2009-cu ildə iqtisadi fəaliyyətlə məşğul olan əcnəbilərin sayı 5784 nəfər təşkil edib ki, onların da 2090-i hasilat sənayesində, 1781-i inşaatda, 377-si emal sənayesində, 241-i nəqliyyat və rabitə sektorunda, 139-u daşınmaz əmlakla əməliyyatlarda, 317-si ticarətdə, 199-u təhsildə, 640 nəfəri isə başqa sahələrdədir.
İşsizliyə görə yardımın orta məbləği 176,5 manatdır.
Yanvarın 21-nə olan rəsmi məzənnə 0,8033 AZN/USD təşkil edir.
