Azərbaycan, Bakı, 11 fevral / Trend , müxbir N.İsmayılova/
Keçən ilin yekun analizləri göstərib ki, Azərbaycanda son illər inkişaf etməyə başlayan kredit ittifaqları (maliyyə kooperativləri) dünyanı bürüyən qlobal iqtisadi böhran şəraitində yerlərdə özləri öz ehtiyaclarını ödəmək məqsədilə fəaliyyət göstərən ən mütərəqqi qurum kimi təsdiq ediliblər. Bu barədə Azərbaycan Kredit İttifaqları Assosiasiyasının məlumatında deyilir.
2009-cu ildə Azərbaycan Kredit İttifaqları Assosiasiyasının (AKİA) üzvü olan kredit ittifaqlarının aktiv üzvlərinin sayı əvvəlki ilə nisbətən 3760 nəfər və ya 40,7% artaraq 13093 nəfərə çatıb.
"Bütün bunlar bir daha onu göstərir ki, ölkəmizdə dövlət, hökümət və AKİA tərəfindən aparılan məqsədyönlü siyasət və təşviqat işləri nəticəsində regionlarda ehtiyacı olan insanların kredit ittifaqlarına (maliyyə kooperativlərinə) inam və etibarları artıb, özlərinin faydalı məşğulluqlarını təmin etmək məqsədi ilə onların xidmətlərindən hazırkı tələblər səviyyəsində istifadə etməyə başlayıblar", - məlumatda deyilir.
