Azərbaycan, Bakı, 1 may /Trend, müxbir Ü.İsmayılova/
"Alfa Sığorta" şirkətinin inkişaf planında ilin sonunadək tədiyənin həcmi üzrə bazarın liderləri onluğuna daxil olmaq məsələsi var. Bu barədə şənbə günü şirkətin Direktorlar Şurasının rəhbəri Xəyal Məmmədxanlı bildirib.
"İlin sonunadək şirkət tədiyə yığımını maksimum üç dəfə artırmaq niyyətindədir", - Məmmədxanlı bildirib. 2009-cu ilin yekunları üzrə "Alfa Sığorta"nın tədiyələri 0,93 milyon manat, ödənişləri 0,26 milyon manat təşkil edib. Onun sözlərinə görə, tədiyələr sığorta məhsullarının yeni növlərinin tətbiqinin, həmçinin potensial müştərilər tərəfindən şirkətə olan inamın artması hesabına artırılacaq.
"Şirkətin inkişafı təsisçilər tərəfindən təsdiqlənmiş plan çərçivəsində təmin olunacaq. Plan 2015-ci ilədək olan dövrü əhatə edir", - Məmmədxanlı deyib.
Onun sözlərinə görə, plana ilin sonunadək nizamnamə kapitalının minimum bir milyon manat artırılması daxildir.
"Nizamnamə kapitalının 2010-cu ildəki fəaliyyətin yekunları üzrə əldə olunan mənfəətin hesabına, əgər mənfəət lazım olan səviyyəyə çatdırılmasa, qismən səhmdarın investisiyaları hesabına artırılması planlaşdırılır", - Məmmədxanlı bildirib.
"Alfa Sığorta" ASC 1997-ci ilin avqustunda "Murad" sığorta şirkəti adı ilə qeydiyyata alınıb və dövlət qeydiyyatı haqqında sertifikat alıb. 2006-cı ilin dekabrında şirkətin 100 faiz səhmi "Texnikabank" ASC tərəfindən alınıb. Şirkət sığortanın 25 növü üzrə xidmət göstərir. Birinci rübdə şirkətin fəaliyyətinin yekunları üzrə tədiyələr 0,28 milyon manat, ödənişlər 0,04 milyon manat təşkil edib.
