Azərbaycan, Bakı, 18 iyun /Trend, müxbir D.Xatınoğlu/
Əfqanıstanın Pekindəki səfirliyinin katibi Harun Nəcmpur Trend-ə bildirib ki, Çin Əfqanıstanda sərmayə yatırımlarını artırmaq niyyətindədir.
Əfqanıstanın mədənlər naziri Vəhid Şəhraninin verdiyi məlumata görə, ABŞ Geologiya Mərkəzinin iyunun 12-də yaydığı statistika ilə ölkənin yeraltı sərvətlərinin 3 trilyon dollar təşkil etdiyini bildirərək, xarici investisiyaların cəlb edilməsini hakimiyyətin əsas prioritetlərindən olduğunu vurğulayıb. Bundan əvvəl, Əfqanıstanın yeraltı sərvətlərinin dəyərinin 1 trilyon dollar təşkil etməsi təxmin olunurdu.
Nəcmpur telefonla Pekindən bildirib ki, hazırda Çin "Eynək" mis mədənində 3 milyard dollar sərmayə yatırımını vəd edib, lakin son müzakirələrə görə, investisiya yatırımlarının 10 milyard dollara qaldırılması üzrə razılıq əldə olunub.
Rəsmi Kabil xarici investisiyaların cəlb edilməsi üçün daha aktiv fəaliyyə başlayıb. Əfqanıstan son bir həftədə Britaniya investorlarının bu ölkədə sərmayə yatırması üçün xüsusi tədbirlər həyata keçirib.
Əfqanistanın mədənlər naziri iyunun 25-də Böyük Britaniyaya səfər edəcək.
Əfqanistan Xarici İşlər Nazirliyinin mətbuat xidməti Trend-ə elektron poçtla bildirib ki, hazırda ölkə Prezidenti Həmid Kərzai Yaponiyadadır və səfərinin əsas məqsədi yapon investorlarını bu ölkədə sərmayə yatırmağa cəlb etməkdən ibarətdir.
Yaponiya ABŞ-dan sonra Əfqanıstana maliyyə yardımı göstərən ikinci ölkədir. Hazırda rəsmi Tokyo Kabilə 5 milyard dollar yardım edəcəyini vəd edib.
Nəcmpur bildirib ki, Əfqanıstanda qaz və neft ehtiyatları da mövcuddur.
ABŞ Geologiya Mərkəzinin statistikasına əsasən, Əfqanıstanda təxminən 1,6 milyard barel neft və 444 milyard kubmetr qaz ehtiyatı var.
