Аzərbaycan, Bakı, 12 iyul /Trend,
müxbir Ü.İsmayılova/
Mayın 7-də sığortaçıların sığorta qanunvericiliyi ilə müəyyən edilmiş ödəniş qabiliyyəti və sığortaçıların maliyyə sabitliyi normativlərini yerinə yetirməsi üzrə dövlət sığorta nəzarəti orqanının göstərişlərinin yerinə yetirilməməsi ilə bağlı Azərbaycan Maliyyə Nazirliyi tərəfindən fəaliyyəti dayandırılan Azərbaycanın "Günay Sığorta" şirkətinin fəaliyyəti iyulun sonuna qədər bərpa olunacaq. Bu barədə bazar ertəsi "Günay Bank"ın idarə heyətinin sədri Emin Ağayev bildirib.
"Belə gözləntilər təxminən 25-26 iyulda şirkətin səhmlərinin əlavə emissiyalarının yerləşdirilməsi planları ilə bağlıdır", - Ağayev deyib.
Onun sözlərinə görə, yeni emissiyanın yerləşdirilməsi nəticəsində şirkətin ümumi kapitalı 2,6 milyon manata çatacaq.
"Sığorta fəaliyyəti haqqqında" qanuna uyğun olaraq 2010-cu il yanvarın 1-nə sığorta şirkətləri ümumi kapitallarını iki milyon manata qədər artırmalı idilər.
Yanvar-may aylarının yekunlarına görə, "Günay Sığorta" şirkətinin sığorta haqları 0,44 milyon manat təşkil edib.
1992-ci ildən fəaliyyət göstərən "Günay Sığorta"nın yeganə təsisçisi Azərbaycanın "Günay Bank" səhmdar bankıdır.
İyulun 12-nə olan rəsmi məzənnə 0,8038 AZN/USD təşkil edir.
