Azərbaycan, Bakı, 24 avqust /Trend, müxbir N.İsmayılova/
Azərbaycanda avtomobil alışı üzrə kreditlərin verilməsində stabil şərtlər qorunub saxlanılır. Bu barədə avtomobil istehsalında liderlik edən şirkətlərin Azərbaycandakı nümayəndəliklərindən bildiriblər. Avtomobil salonları avtomobil satışı üzrə kreditlərin faiz dərəcələrinin daha çevik olması səbəbindən tərəfdaş bankların sayını artırmaqda davam edir.
BMW avtomobil salonundan deyiblər ki, salon hazırda BTB Bank vasitəsilə kreditlə satış həyata keçirir. Bu zaman satış birillik kredit üzrə illik 15 faiz, ilkin ödəniş 30 faiz, beşillik alış üzrə 19 faizlə həyata keçirilir.
KIA avtomobil salonu Unibank, Bank of Baku və Azərbaycan Beynəlxalq Bankı vasitəsilə kreditlə avtomobillərin satışını aparır. Kredit aşağıdakı şərtlərlə həyata keçirilir: ilkin ödəniş 20 faiz, beşillik kredit üçün illik faiz dərəcəsi 18 faiz, bir il üçün isə 17 faiz təşkil edir.
Opel avtomobil salonundan bildiriblər ki, salon Naxçıvanbankla əməkdaşlıq edir və avtomobillərin kreditlə alışı ilkin ödəniş 30 faiz, illik faiz dərəcəsi 19 faiz olmaqla üç il müddətinə mümkündür.
Mazda avtomobil salonu Bank Respublika ilə əməkdaşlıq edir və avtomobillərin kreditlə alışı ilkin ödəniş 30 faiz, illik faiz dərəcəsi 21 faiz olmaqla beş il müddətinə mümkündür. Salon həmçinin avtomobilləri ilkin ödəniş 20 faiz, illlik 20 faiz olmaqla beş il müddətinə, ilkin ödəniş 18 faiz olmaqla, kredit verən DəmirBankla da əməkdaşlıq edir.
Subaru avtomobil salonundan bildiriblər ki, salon Bank Respublika ilə əməkdaşlıq edir. Kreditlə avtomobillərin alışı beş ilə illlik 21 faiz və 30 faiz ilkin ödənişlə, üç ilə illik 21 faiz və 20 faiz ilkin ödənişlə mümkündür. Salon AccessBankla da əməkdaşlıq edir. Bu zaman avtomobillərin kreditlə alışı üç ilə illik 26 faiz və 10 faiz ilkin ödənişlə həyata keçirilir.
Hyundai avtomobil salonu Bank of Baku və Unibank vasitəsilə avtomobillərin satışını həyata keçirir. Bu zaman kreditlər illik 20 faiz və ilkin ödəniş 20 faiz olmaqla üç ilə verilir.
Nissan və Ford avtomobil salonları NBC Bank vasitəsilə aşağıdakı şərtlərlə kreditlər verir: beş il müddətinə kredit verilən zaman ilkin ödəniş 20 faiz, illik 19 faiz dərəcəsi, ilkin ödəniş 50 faiz olmaqla isə illik 18 faiz dərəcəsi ilə verilir. Birillik müddət üçün ilkin ödəniş 20 faiz, illik faiz dərəcəsi 15 faiz təşkil edir.
Toyota avtomobil salonunda avtomobillərin kreditlə satışının AmrahВank vasitəsilə həyata keçirildiyi bildirilib. Kreditlər üç il müddətinə ilkin ödəniş 20 faiz, illik 19 faiz dərəcəsi olmaqla verilir.
