Azərbaycan, Bakı, 6 sentyabr /Trend, müxbir A.Axundov/
Azərbaycanın sığorta şirkəti "Bakı Sığorta" 2011-ci ilin əvvəlində kapitalını iki dəfə artırmağı planlaşdırır. Bu barədə bazar ertəsi şirkətin idarə heyəti sədrinin yeni müavini Mehman Əliyev bildirib. Əliyev əvvəllər "Günay Sığorta" şirkətində analoji vəzifəni tutub.
"Kapitalın şirkətin 2010-cu ildə fəaliyyəti nəticəsində əldə edəcəyi gəlirin sayəsində artacağı gözlənilir", - Əliyev qeyd edib. (Hökumət sığorta şirkətlərini üç il müddətinə kapitallaşmaya yönələn gəlir vergisindən azad edib).
İndi şirkətin nizamnamə kapitalı 4 377 480 manat təşkil edir, halbuki 2011-ci ilin əvvəlinə ölkənin Maliyyə Nazirliyinin minimal tələbi 3,5 milyon manat təşkil edir.
"Bakı Sığorta " Azərbaycanın sığorta bazarında 28 avqust 2007-ci il tarixdən fəaliyyət göstərir və 2009-cu il sentyabrın 4-də müddətsiz lisenziya alıb. Şirkətin səhmlərinin nəzarət paketi "Bank Respublika" ASC-yə məxsusdur. "Bakı Sığorta" ASC "Tural Sığorta" sığorta şirkətinin nəzarət paketinin (səhmlərin 50 faizindən çoxu) alınması yolu ilə yaradılıb. Şirkətin yeniləşdirdiyi səhmlərin qalığı fiziki şəxslər arasında bölüşdürülüb.
Şirkətin 24 növ sığorta xidmətinin göstərilməsinə lisenziyası var. Onların dördü icbaridir. Onlardan ənənəvi mülkiyyət sığortası, fərdi sığorta, məsuliyyət sığortası, kosmik, enerji risklərinin sığortası, ətraf mühitin çirkləndirilməsi risklərinin sığortasını və s. göstərmək olar. "Bakı Sığorta" həm fiziki, həm də hüquqi şəxslərə xidmət göstərir.
Şirkət sədrinin müavinin sözlərinə görə, "Bakı Sığorta"nın planlarına göstərilən xidmət spektrinin genişləndirilməsi də daxildir.
"Hazırda bəzi yeni növ xidmətlərin göstərilməsinə icazənin alınması ilə bağlı işlər görülür", - Əliyev bildirib.
"Bakı Sığorta" cari ilin sonunadək sığorta yığımlarını üç milyon manata çatdırmağı planlaşdırıb. Maliyyə Nazirliyi nəzdində Dövlət Sığorta Nəzarəti Xidmətinin məlumatına görə, 2010-cu ilin ilk yeddi ayında şirkətin sığorta yığımlarının həcmi 1,72 milyon manat təşkil edib, ödənişlər isə 0,57 milyon manat məbləğində həyata keçirilib.
"Bankların avtomobil kreditləşməsini bərpa etməsi şirkətin avtomobil sığortası üzrə portfelinin genişləndirilməsinə müsbət təsir göstərib, buna görə də biz sığorta haqlarının həcminin üç milyon manatadək artacağını proqnozlaşdırırıq", - sədr müavini vurğulayıb.
O hesab edir ki, ümumilikdə Azərbaycanın sığorta bazarının inkişafı üçün ölkə əhalisinin sosial vəziyyətinin yaxşılaşdırılması lazımdır.
Sentyabrın 6-na olan rəsmi məzənnə 0,8034 AZN/USD təşkil edir.
