Azərbaycan, Bakı, 25 sentyabr /Trend, müxbir İ.Xəlilova/
2010-cu ilin yekunlarına görə, "Azal Sığorta" ASC sığorta yığımlarını 13-13,5 milyon manata çatdırmaqla, onları ötən ilin göstəricisi səviyyəsində saxlamağı planlaşdırır. Bu barədə şirkətin idarə heyətinin sədri Niyazi İmanov deyib.
"Sığorta haqlarının artması ötən ilin göstəricisi ilə müqayisədə 1 faiz ola bilər", - İmanov bildirib. - "Lakin müəyyən edilmiş göstərici deyil, yeni müqavilə və ya tenderlərdən asılı olaraq faktiki yığımlar gözlənilənləri ötə bilər".
Yanvar-avqustda şirkət 10,87 milyon manat səviyyəsində sığorta haqqı yığıb, ödənişlər isə 0,41 milyon manat səviyyəsində edilib.
İmanovun sözlərinə görə, şirkət bu il iki yeni - bank risklərinin sığortalanması (pul itkisi və digər risklərə görə) və bankların öz şəxsi ipoteka proqramları çərçivəsində verdikləri ipoteka kreditlərinin sığortalanması sığorta məhsulunu tətbiq etməyi planlaşdırır.
"Biz artıq Maliyyə Nazirliyi nəzdində Dövlət Sığorta Nəzarəti Xidmətindən bu növlərə görə icazə almışıq", - "Azal Sığorta"nın rəhbəri deyib.
Şirkət bank risklərinin sığortalanmasının ilkin mərhələsində "Silk Way" bankı ilə əməkdaşlıq etməyi planlaşdırır. Bu xidmət növünün göstərilməsindən ilkin olaraq 50 min manat sığorta haqqının yığılması gözlənilir.
İmanovun sözlərinə görə, ipoteka kreditləri üzrə sığorta obyekti ipoteka obyekti qismində çıxış edən daşınan və daşınmayan əmlak, kredit alıcısının əmək qabiliyyəti və onun fərdi sığortalanması ola bilər.
Hazırda şirkətin 17 növ sığorta xidməti göstərməsinə icazəsi var. Onlardan 2-si icbaridir.
Hava nəqliyyatının sığortalanmasında ixtisaslaşan "Azal Sığorta" Sığorta Şirkəti 1995-ci ildə yaradılıb. Şirkətin təsisçisi "Azal" QSC-dir.
Sentyabrın 25-nə rəsmi məzənnə 0,8030 AZN/USD təşkil edir.
