Türkmənistan, Aşqabad, 14 oktyabr /Trend, müxbir H.Həsənov/
Oktyabrın 13-14-də Aşqabadda "British Petroleum", "Gaffney", "Cline & Associates", "Arawak Energy", "Shell", "De La Rue", "Rolls-Royce", "WYG International", "Worley Parsons", "BSP International Foundation Ltd", JCB və başqa şirkətlərin iştirakı ilə Türkmənistan və Böyük Britaniyanın birgə Sənaye-Ticarət Şurasının iclası keçirilir.
Türkmənistan Prezidenti Qurbanqulu Bediməhəmmədov dünən Britaniya nümayəndə heyətinin başçısı, Şuranın həmsədri Ronald Neşi qəbul edib. Qonağın sözlərinə görə, "Aparıcı Britaniya şirkətləri perspektiv, dinamik inkişaf edən türkmən bazarında öz iştiraklarını genişləndirməyə və yeni birgə layihələrin həyata keçirilməsində iştirak etməyə səy göstərirlər".
"Neytral Türkmənistan" qəzetinin verdiyi məlumata görə, danışıqlarda energetika, emal, nəqliyyat infrastrukturunun inkişafı, yeni texnologiyaların tətbiqi, kadrların hazırlanması kimi sahələrdə gələcək tərəfdaşlığın prioritet istiqamətləri müzakirə edilib.
Öz növbəsində, milli telekanal "Altın Əsir" cümə axşamı qeyd edib ki, Londonun yüksəkvəzifəli nümayəndəsi Türkmənistanın həyata keçirdiyi enerji siyasətinə dəstəyini bildirərək, rəsmi Aşqabadın irəli sürdüyü və BMT Baş Assambleyasının yüksək tribunasından səsləndirilən qlobal enerji təhlükəsizliyinin təmini üzrə təşəbbüslərin xüsusi aktuallığını qeyd edib.
Türkmənistan hökumətinin mətbuat xidməti öz məlumatında Berdiməhəmmədovun "Türkmənistan enerji dövləti olaraq və neft-qaz sahəsinin istehsal infrastrukturunun tam modernləşdirilməsi və enerjidaşıyıcılarının dünya bazarlarına ixrac marşrutlarının diversifikasiyası strategiyasını həyata keçirərək, böyük potensiala və bu sahədə yeni böyük layihələrin həyata keçirilməsi üçün bütün zəruri vasitələrə malikdir və xarici, o cümlədən, Avropa tərəfdaşları ilə gələcək əməkdaşlığın genişləndirilməsinə hazırdır", - sözlərini sitat gətirir.
